Îdareyê Xoserî yê Şingalî da pêhesnayene ke PDK pê hêzanê xo yê çekdaran cehd keno ke debikewo Şingalî û vat ê do çirey destûrê naye medê û xo bipawê.

Îdereyê Xoserî ard ziwan ke înan eşnawito hêzê çekdarî yê PDKyî  wazenê ke debikewê Şingalî û vat: ''No provokasyon o. Ma do vera îşxalê Şingalî bêveng nêmanê û heqê xo yê xopawitişê meşrûyî bixulnê.'' Îdareyê Xoserî veng da ke wa hukmatê Iraqî û rayapêroyî vera nê provokasyonan bêveng memamê.

Eşkerayîye de nê ameyî vatene:

''Seke yeno zanayene Iraq de wextê vîjnayîş o. Seba ke vîjnayîş bi hewayêkê demokratîk û azadî bêro kerdene çîyo ke destê ma ra yeno ma kerd. No vîjnayîş semedê ameyoxê Iraqî û şarê êzidîyî yê Şingalî zaf muhîm o. Şingal de bitaybetî 2017î ra nata hadîseyêk nêqewimîya, asayîşê Şingalî de problemêk çîn o. Xabata vîjnayîşî zî ramojnena ke eşkera fînena çiman ver ke problem çîn o. Reyna Babê Şêx zî ame Şingal şar zîyaret kerd no zî na rewşe îstap keno.

Hewteyo peyên ê vîjnayîşî de PDK pê hêzanê xo yê çekdaran cehd keno ke debikewo Şingalî. No provokasyon o. Yeno waştene ke wa têmîyankewtiş vejîyo.  Eşkera yo ke nê vîjnayîş de PDK  do bin bikewo û bitaybetî zî Şingal de do binbikewo. Senî ke yeno vînayene mîyanê PDKyî de problêmê xorînî estê. Binkewtişê xo wazenê pê şerran, pêkewtişan û provokasyonan biniminê! Ma do çirey qebul nêkerê ke hêzê PDKyî pê çekan debikewê Şingalî. Ma tîya ra danê eşnawitene ke ma do vera înan xoverdayîşê pîlî bidê û îradeyê şarê xo medê eciqnayene.

Eke vera şarê ma hêrişêk bêro kerdene ma do heqê xo yê xopawitişê meşrûyî bişuxulnê. Ma îşxalê vera Şingalî qebul nêkenê. Êyê ke bîyî sebebê fermanî mumkin nîyo ke ma înan qebul bikerê. Eke Şingal de bêhûzûrîyeke bêro qewimîyayene, berpirsîyarê ci do PDK bo.  Ma venga hukmatê Iraqî zî danê; wezîfeyê xo bîyarê ca, vera nê provokasyonî û zulmê vera şarê Şingalî vejîyê.''