Tay tepişteyê sîyasîyê ke hetê PDKyî ra Behdînan de tepişîyayê roja şemeyî ra nata grevê vêşanîye de yê û yeno vatene ke rewşa înan a weşîye xirab a.

Eyaz Keremo ke azadîya îfadeyî ra 22ê teşrîna verêne ya 2020î de tepişîya û 16ê sibate de 6 serrî ceza dîyaye ci pê mesajêk da zanayene ke o pa tay embazanê xo roja şemeyî ra nata grevê vêşanîye de yo û rewşa înan a weşîye xirab a.

Eyaz Keremî vat: ''Ewro zîndanê Asayîşî ver bi Zîndanê Gewranî ma berdî. Înan ma yewbînan ra cîya kerdî, hayîya ma pê yewbînan çin a. Rewşa zîndanî zaf xirab a. Dewaya ma sîyasî ya. Zîndan de îşkenceyo psîkolojîk û fîzîkî yeno kerdene. Îfadeyê ma vurîya. Nêverdenê ma avûkatanê xo bivînê.''

Eyaz Keremî venga Komîsyonê Heqanê Merdiman ê Parlamentoyê Başûrê Kurdîstanî da ke rewşa tepişteyanê ke kewtê grevê vêşanîye teqîb bikerê.