Elcewaz heta serra 1952î bajarekêkê qezaya Xelatî ya Bedlîsî bi. Serra 1953î de bi qeza. Elcewaz de ke kurdî, tirkî û zaf şarê bînî tede pîya ciwîyenî bi serran o ke hedefê polîtîkayanê asîmîlasyonî yê dewlete yo. Bi taybetî kurdê Elcewazî binê teda û zorbazîya dewlete de yê. 

Şaredarîya Elcewazî ya AKPyî ya ke 3 serr ê ke maeşê karkeran bi hawayêkê nîzamî nêdayî, 8 meng ê ke maeşê karkeran qet nêdayî. Karkerê ke seba maeşê xo şaredarîye de qisey kenê înan rê şîdet û teda yenê kerdene. Ame parekerdene ke şaredarîye karkeran rê gef werd û vat ke eke karkerî çapemenîye reyde qisey bikerê ê do şaredarîya ra bêrê vetene.  Eşkere bi ke selahîyetdaranê şaredarîya AKPyî karkeran rê vat: "Pere çin o, kam wazeno wa kar ca verdo.'' 

Karkerêko ke nameyê xo eşkera nêkerd vat: "Tersê AKPyî ra çew nêeşkeno Elcewaz de bigêro heqanê xo. Êyê ke gêrenê heqanê xo yan karî yenê vetene yan zî çîyêk yeno sereyê înan. Ma hînî nêeşkenê nan berê keyeyê xo. ''

Karkerêkê bînî zî ard ziwan ke wexto ke ê selahîyetdaran ra maeşê xo wazenê selahîyetdarî înan rê vanê: ''Sûrîye û Iraq de ma şer kenê. Bi mengan o ke ma nêeşkenê maeşê xo bigêrê. Ma rê vanê 'Hukmatê ma Iraq de Sûrîye de şer keno.' Zanenê ke bacê ma, pereyê ma şer de xerc bikerê labelê wexto ke mesele maeşê ma bibo vanê 'çin o'. Ma gerre zî kerd. Mufetîşî ameyî la mesele çare nêkerde û şîyî. Mufetîşî karmendê AKPyî bîyî, selahîyetdaranê şaredarîye ra bertil girewt û şîyî.''