Kampa Multecîyan a Şehîd Rusmet Cûdîyî (Mexmûr) a ke pabesteyê Musulî ya 196 roj ê ke binê ambargoyê PDKyî de ya. Dima ke 17ê temmuza 2019î de vera endamê MÎTî yê Konsolosîya Tirkîya ya Hewlerî hêriş  kerd û endamê MÎTî ame kiştene, Mexmûr ser o ambargo dest pêkerd. Kampa Multecîyan a Mexmûrî nêzdîyê 7 meng ê ke binê ambargoyê PDKyî de ya.

Hemserekê HDPyî yê Amedî Zeyat Ceylanî derheqê ambardoyê Kampa Rustem Cûdîyî de qisey kerd û ard ziwan ke şarê Mexmûrî semedê şerê gemarinî yê dewleta Tirkîya ame mexdurkerdene û erdê xo de bi multecî.  Ceylanî îfade kerd ke serebûtê Hewlêrî ra zaf mazlum û têkoşerê Mexmûrî yeno cezakerdene û vat:"Tedaya dewlete ra şarê ma şî û bi multecî. Serranê dergan ra nata şarê ma sey multecîyan yenê medurkerdene. Nika her parçeyê Kurdîstanî de vera kurdan hêriş esto. Ma way û birayanê xo yê başûrijan ra bi taybetî Kek Mesud Barzanî ra wazenê ke dormegirewtişê Mexmûrî wedarê. Şarê ma yê Maxmûrî naye heq nêkeno.

Bi serran o warê yewîya neteweyîye de xebatî yenê kerdene. Derheqê na babete de xîretê Kek Mesud Barzanî zî zaf zêde yê. Xeta yewîye Mexmûr de ameye dormegirewtene. Ganî bi taybetî Kek Mesud bikewo dewre û ambargo wedaro. 

Ewro pêro parçeyanê Kurdîstanî de vera destkewteyanê kurdan hêrişî estê. 40 serrî yo ke Kurdîstan de şer esto. Ganî kiştişê kesêkî ra semed şarêk nêro cezakerdene. Ganî ma pîya şerê vera kurdan vindarnê. Ganî kurdî yewîya xo awan bikerê. Eke na bêra caardene ma pêro dinya de bi nasname, ziwan û kulturê xo eşkenê vajê ma estê.  Mexmûr de vera şarê ma hêriş ame kerdene. Ganî hukmatê Başûrê Kurdîstanî vera naye nêrazîbîyayîşê xo bimojno. Şengal de vera şarê ma zaf hêrişî bîyî la hukmatê Başûrê Kurdîstanî nêrazîbîyayîşê xo nêmojna. Ganî mabênê Tirkîya û Başûrê Kurdîstanî de têkilîyêke biba ma vera naye de nîyê. Labelê ganî na têkilîye way û birayanê xo ser o bikerê."