Se ra 80ê cografyaya Colemêrgî qedexekerde yo. Şarê herême nêeşkeno pes bero wareyan. Walîtîye serra 2016î ra nata 15 rojan de yew qedexeyê çalakîye û nawnayîşan şaristan de newe kena û bi nê hawayî qesas gêna. Goreyê şarê Colemêrgî semedo ke înan se ra 85ê rayê xo dayê HDPyî rejîmê AKPyî nê qedexeyan înan rê ferz keno.

Şaristan de pernayîşê balonan zî qedexe yo. Nê qedexeyê ke têna vera kurdan yenê kerdene, semedo ke herême bêra vengkerdene yenê caardene. Colemêrg de qedexeyan ra heywankarîye qedîyena. 

Merkezê heywankarîye Wareyê Berçelanî qedexe yo. Wareyî şayî û festîvalanê Colemêrgî rê meymandarîye kerdêne. Şarê herême semedo ke şoro Berçelan neçare yo ke Walîtîya Colemêrgî, Mudirîya Asayîşî û artêşa tirke ra destûr bigêro.

Roniştoxêkê herême vat: ''Ê destûr nêdanê her kesî. Ma nêeşkenê ferdanê keyeyê xo zî berê wareyan. 24 saetan ÎHA û helîkopterî ma ser de gêrenê. Leşkerî kêm nêbenê. Kesêk bêdestûr bikewo wareyan yeno destbendkerdene.''