Dîya zanayene ke Dêrsim de  qorîcîyê ke Çemişgezekî ra ameyî dewa Beroçî ya qezaya Mazgêrdî de dewijî tehdît kerdî.

Dewa Beroçî ra Faîk Şahanî muracatê Komeleya Heqanê Merdiman (ÎHD) ya Dêrsimî kerd. Dima ra şubeyê ÎHDyî yê Dêrsimî de kombîyayîşê çapemenîye ame kerdene.

Kombîyayîş de îdarekaranê ÎHDyî yê Dêrsimî ra Agît Aralî qisey kerd. Aralî vist vîrî ke sîstemê qorîcîye xeylêk wexto dewam keno û vat qorîcîyî semedê şarî tehlukeyo pîl ê. Aralî ard ziwan ke nê hêzê ke hukmatî ra paştî genê zetê dewijan kenê.

Dewa Beroçî ra Faîk Şahanî vat: ''Qorîcîyê bi nameyê Aga Yildirim û Nurettîn Akpolatê ke bi wesayîtanê karî ameyî erdê dewa ma vato ê do tîya ca bidê xo. Ma zî vat heta ke destûrê dewijan çînêbo ê nêeşkenê tîya vinderê. Nayî ser o înan ma tehdît kerd û vat ''şima zanê ma kam ê, ma çi biwazê ma kenê. Dadger, dozger û leşkerê ma estê. Şima nêeşkenê ma, ma çiwext biwazê eciqnenê.  Ma do tîya xo ca bikerê.'' Keso ke înan rê serkêşîye keno zî Alî Gordogar o. Heme dewijî rîyê qorîcîyan ra qerqilîyenê û xo binê zextî de hîs kenê.''