24ê çeleyê 2020î de erdlerzê Xarpêtî qewimîyabi û erdlerz de Dêrsim de zî tay keyeyî rijîyabîy. Hemwelatîyanê Dêrsimî rê soz amebi dayene ke keyeyê neweyî do bêrê viraştene. Dewa Demîrkapi ya Dêrsimî de rixmê sozê selahîyetdaran keyeyê neweyî nêvirazîyayî.

Dewije Turkane Dagbaşi îfade kerd ke ê werteyê zimistanî de mexdûr bîyî û vat: ''Werteyê zimistanî de înan ma keyeyê xo ra vetî. Ma firaqê xo teber de şitî, teber de mendî. Wa selahîyetdarî keyeyê ma virazê.''

Dewij Kalî Dagbaşiyî zî pare kerd ke o 72 serre yo û erdlerzî ra dima ci rê têna xeymêke dîyaye. Kalîyî vat: ''Seba viraştişê keyeyî 9 ton demîr, 5 hezar fîrketî dîyayî. Mi di mangayê xo rotî, banka ra kredî girewte la reyna zî ez nêeşkaya pere kom bikera. Ma teber de manenê, teber de robarê xo kenê. Xeyme teng a, ma tede 3 kesî manenê. Seba viraştişê keyeyî 200 hezar TL lazim o. Ez nê pereyî ça ra bivîna?''