Dewleta tirke semedê îşxalî hêrişê Rojawan û Başûrê Kurdîstanî kena û pê qetilkerdişê sivîlan xîret kena ke waranê îşxalkerdeyan bizêdîna.

Dewleta tirke 2018 de Efrîn, 2019 de Girê Sipî û Serêkanîyê îşxal kerdî. Nê cayan de xoverdayîşê QSDyî yê vera îşxalî dewam keno. Herêmanê îşxalkerdeyan de her roje sûcê sey talan, tacîz, tecawuz, remnayîş, kiştişî qewimîyenê. Goreyê Kongreya Starî menga tebaxe de Efrîn de 196 kesî ameyî remnayene ke nînan ra 15ê ci cinî yê.

Tirkîya Başûrê Kurdîstanî de zî 2017 de vera herêma Xakûrkê û hezîrana 2020î de zî vera Heftanînî hêrişê îşxalî dayî destpêkerdene. Xoverdayîşê gerîlayan ê bi nameyê Cengê Heftanînî zî vera îşxalî dewam keno. Destpêkê serre de dewleta tirke hêrişê Garê zî kerd la 13ê çeleyî de xoverdayîşê gerîlayan ser kewte. Dewleta tirke 23-24ê nîsane de vera Metîna, Zap û Avaşînî dest pê hêrişan kerd. HPG çarçewa Hemleyanê Şorişgêran ê Cengê Xabûrî û Bazanê Zagrosî de nê herêman de xo ver dano.

Rixmê paştdayîşê hêzan ê mîyanneteweyîyan, herêmîyan û PDKyî Tirkîya heta nika hêrişanê vera Rojawan û Başûrî ra netîce nêgirewte.

Bîlançoya çar mengan

Goreyê doneyanê HPGyî mîyanê çar mengan de (24ê nîsane-23ê tebaxe) 579 leşkerê tirkî kişîyayî, bi seyan leşkerî birîndar bîyî. Gerîlayan 458 çalakîyî kerdî, vera tunelanê şerî 132 çekê kîmyewî û gazê jehrînî xebitnayî. Nê hêrişan de 70 gerîlayî şehîd bîyî.

Dewleta tirka ke pabeyê xoverdayîşê winasênî nêbîye dest pê bombakerdişê şaristan, qeza, dewe û wareyanê Rojawan û Başûrê Kurdîstanî kerd. Dewleta tirke hêrişê sivîlan kena, adir verdena daristanan.

Menganê hezîrane û tebaxe de qirkerdişê sivîlan zêdîya

Goreyê raporê hezîrana 2021î yê Merkezê Çapemenîye yê QSDyî dewleta tirke herêmanê îşxalkeran de 13 hêrişî kerdî û xeylêk kesî qetil kerdî. Hêrişanê vera waranê sivîlan de 16 sivîlî ameyî qetilkerdene û bi desan sivîlî birîndar bîyî. Tebaxe de Zirgan, Til Temir, rayîrê Elî Feroyî, Eyn Îsa û Minbic de 11 sivîlî kişîyayî.

Hêrişanê vera Başûrî de zî doman zî tede 14 sivîlî ameyî kiştene, 13 kesî zî birîndar bîyî.

24ê nîsana 2021î ra heta 31ê tebaxa 2021î ra nata hêrişê dewleta tirke ya îşxalkere yê vera waranê sivîlan û netîceyê ci wina yê:

20ê gulane de çar gerîlayê ke tedawî ra agêrayêne Dilgeş Serhad (Mehmet Emîn Alkaş), Zagros Glort (Selahattîn Dede), Dara Bêrîtan (Babek Ebdiselendecî) û Firat Şoreş (Anter Firat) nêzdîyê dewa Mangişkî ya Dihokî de ameyî qetilkerdene.

24ê gulane de hêrişê hewayî yê vera dewa Dêşişî ya Kanîmasî de kesêk bi giranî birîndar bi.

26ê gulane de qezaya Derkarî ya Zaxoyî de Hesen Mûhsîn û Alî Mûhsîn hêrişê hewayî de birîndar bîyî.

Şewa 4ê hezîrane de dewa Kilûtî ya qezaya Şêrawa ya Efrînî de bombarduman de domane Zeynebe Hisên Îbrahîm ameye qetilkerdene.

5ê hezîrane de Metîna de bombardumanê vera konvoyê leşkerî yê PDKyî de Hejar Sûbhî Amedî (35), Îmad Marûd (36), Qaid Reşîd Kelekçî (35), Karwan Tofiq Dinarteyî (34) û Nezwar Abdulrahaman (44) merdî û 4 pêşmergeyî zî birîndar bîyî.

9ê hezîrane de Serêkanîyê de Ehmed El Xezel ame qetilkerdene. 13ê hezîrane de herêma Pişdêrî ya Silêmanî de hêrişê vera wesayîtêkê sivîlî de Ebûbekir Howfiq, Ebas Îbrahîm Mehmûd zî tede 4 kesî kişîyayî.

19ê hezîrane de bajarekê Şarbajêrî yê Silêmanî de hêrişê vera wesayîtêkî de gerîlayê YRKyî Ekîn û Adar şehî bîyî.

21ê hezîrane de leşkeranê tirkan kolber Makû Ezîz Mihemedzade qetil kerd.

Artêşa tirke 4ê tebaxe de dewa Sefawî ya Eyn Îsayî de heman keyeyî ra Zêdan Xelef El Îsa (54), domanê ci Ziyad (12), Mûne û Hûda qetil kerdî. 13ê tebaxe de dombardumanê vera dewa Dêşîşî ya Kanîmasî de Îbrahîm Hesen ame qetilkerdene.

16ê tebaxe de merkezê Şingalî de wesayîto sivîl dîya bombayan ver û hêriş de Fermandarê YBŞyî Seîd Hesen û şerwanê YBŞyî Îsa Xwedêda şehîd bîyî. Medya Qasim Simo, Şamir Abbas Berces, Mîrza Alî jî birîndar

17ê tebaxe de dewa Sikênîyê ya Şingalî de dewleta tirke nêweşxane da bombayan ver. Bombarduman de 4 şerwanê YBŞyî û 4 kedkarê weşîye şehîd bîyî, 4 kesî zî birîndar bîyî. Heman roje hêrişanê vera Til Temir û Zirganî de domanêke û cinîyêke ameyî qetilkerdene.

19ê tebaxe de serê rayîrê Elî Feroyî de wesayîtê fermandaranê QSDyî dîya bombayan ver û hêriş de Fermandar Rênas Roj şehîd bi. Heman roje hêrişêkê bînî de çar endamê Meclîsê Leşkerî yê Til Temirî, Endama Konseya YPJyî û Endama QSDyî Sosine Bîrhat, Egîd Girkê Legê, Rûbar Hesekê û Seyfûllah Ehmed şehîd bîyî û 3 şerwanî zî birîndar bîyî.

22ê tebaxe de verê Keyeyê Birîndaran ê Qamişloyî de dewleta tirke da wesayîtêkî ro û 2 kesî birîndar bîyî. Heman roje dewleta tirke verî Dirbêsîyê de Hemadî Ebîd El Hisên qetil kerd, Mihemed Letîf El Ezawîyî rê îşkence kerd û dima dewa Bankî ya Dihokî de da wesayîtê sivîlan ro. Nê hêrişî de turîstî Ehmed Şakir (40) û Yûsif Umer (26) ameyî qetilkerdene.

26ê tebaxe de qezaya Şêrawa ya Efrînî de Elî Mihemed Hemreşo mayînanê dewleta tirke ra merd.

SÎHAyanê dewleta tirke 30ê tebaxe de kampa êzidîyan a Qadîya ya Zaxoyî daye bombayan ver. Bombarduman de domana 12 serre û dergûşo yew menge merdî, di domanî û Hesen Îbrahîm zî birîndar bîyî.

Çimeyî:

ANF

ANHA

Rojnews