Grevê vêşanîye yê vera tecrîdkerdişê Rayberê Şarê Kurdî Abdullah Ocalanî û binpaykerdişê heqanê tepişteyan 288 rojî yo dewam keno. Dewleta tirke hema zî derheqê grevî de gamêke nêeşte.

Hemserekê HDPyî yê Wanî Çetîn Uyarî derheqê babete de ANFyî rê qisey kerd.

Çetîn Uyarî vist vîrî ke Abdullah Ocalan 22 serrî yo binê tecrîdî de yo û 2015î ra nata nêeşkeno keye û avûkatanê xo bivîno. Uyarî vat: ''Ma weşîya Ocalanî ra qerqilîyenê. Ma veng danê ke cade ey reyde pêvînayîşî bêro kerdene. Zîndanan de bi hezaran embazê ma grevê vêşanîye de yê. Ganî Wezîrîya Edaletî na babete ser o hîsger biba.

Embazê ma yê tepişteyê nêweşî nêeşkenê şorê doktorî, mektubê kurdkî nêdîyenê înan, vera înan hertim teda yena kerdene. Zîndanan de tecrîd esto, tedayê giranî estê. Zîndanan de îşkenceyê vera tepişteyanê sîyasîyanê ke kewtî grevê vêşanîye bîyo sîstematîk. Coka ganî tecrîd bêro wedaritene û çareserîye bêra caardene.''