Licê de şarî DEDAŞ protesto kerdbi ke hacetê humaritişê ceyranî keyeyan ra kiriştbi dîrekan. Protesto de polîsan hêrişê şarî kerdbi û xeylêk kesî destbend kerdbi.

Heyetê HDPyî  qezaya Licê de şarî reyde ame têhet.   Heyet de Wekîlê HDPyî Îmam Taşçier û îdarekarê Rêxistina HDPyî ya Licê zî amade bîyî.

Heyetê HDPyî goş na meseleyanê şarî û esnafan ser. Hemwelatîyan pare kerd ke ê maruzê kerdişan ê xiraban bîyî û vat: ''Polîsî erzenê keyeyê ma ser, na merdimîye nîya. Polîsî doman, cinî û kokimî erdî ser o derg kenê, beranê ma şiknenê. Ciwanan hînî no zulm qebul nêkerd. Ma çara ra bizanê ke faturaya ma çendek a. Huqûqî nîya ke hacetê hûmaritişê ceyranî dîrekan de bibo. Ma ney qebul nêkenê.'' 

Taşçierî zî da zanayene ke pê nê kerdişî şar sey sûcdarî dîyen û vat: ''Ê xîret kenê ke şarî ra zêdêr pere bigêrê. Nêmeyê şewe de berî şikîyenê merdimî yenê destbendkerdene. Ma nê serebûtan her warî de bîyarê ziwan û destê ma ra çita bêro bikerê.''