Vervatoxê Merkezê Îrtîbatî û Çapemenîye yê  Hêzên Parastina Gelî (HPG) Serdar Yektaşî derheqê xoverdayîşê gerîlayan ê  vera hêrişê îşxalê dewleta tirke de ajansê ma rê qisey kerd.

Rewşa peyêne ya operasyonê îşxalî yo ke 23ê nîsane de dest pêkerd senîn a?

 Hêrişê îşxalî 5 mengî yo dewam kenê. Her hele na nêmserre pê şerrê giranî ravêrte. Ganî ma verî nameyî nayî raşt pane. Medyaya şerê taybetî yê dewleta tirke nê sey operasyonêkê  normalî ramojnena. Heqîqat wina nîya.  Xora ma sey rojane û mengane bîlanoyê şerî eşkera kenê. Dewleta tirke kewt Avaşîn, Metîna û Zap û tede mend. Nika Vakurê Kurdîstanî ra heta Herêmanê Pawitişî yê Medya her ca de pê taktkîkê gerîlayanê demê neweyî derbeyê pîlî dîyenê dewleta tirke ro. Girê Sor û Werxelê de raşta zî destanê qehremanîye yenê nuştene. Heftanî ra heta Xakurkê her ca de gerîlayî çalakîyanê xurtan kenê. Dewleta tirke seba ke netîce nêgena çekanê kîmyewîyan şuxulnena.

Şima qey waranê Werxelê û Girê Sorî sey ''Waranê  Xoverdayîşî'' name kenê ?

Waranê Werxelê Girê Sorî de şerê mewzî û tunelan zafêr vejîya vernî. No taktîk eslê xo de sibata 2021î de Xoverdayîşê Garê de kewt pratîk. Nika her cayê Vakurê Kurdsîtanî û Herêmanê Pawitişî yê Medya de tewirê taktîkê gerîlayan yo esasî tîmê gerîlayan ê profesyonelê gêrayedar ê. Zafê çalakîyan hetê înan ra yenê kerdene. Çalakîyê xoverdayîşê tunel û mewzîyan û ê nê tîman yewbînan kenê temam û warê xoverdayîşê xurtî vejenê werte. Coka nê cayî sey waranê xoverdayîşî yenê namkerdene. Êyê ke raştîye şerî nêzanê belka hende mana ci nêdanê la rixmo ke dewleta tirke heme îmkananê xo şuxulnena vera gerîlayan nêeşkena aver şiro. Kewta nê cayan û tede menda, nêeşkena xo bileqino. Embazê ma bi îradeyê Apoyî, qerardarî û sebir şer kenê. Vatişê Rayber Apoyî yê ''teknîko tewr pîl merdim o'' ewro reyna yena heqîqetê ci yeno îspatkerdene. Xora no xoverdayîş bê bedelan nêbeno.  Ewleta tewr sînayeyî yê şarê ma şehîd benê. Tewr peynî de Girê Sor de pê çekanê kîyewîyan 6 embazê ma şehîd bîyî.

Wezîrîyê Pawitiş û Karanê Zereyî yê Tirkîya tim derheqê şehdatê gerîlayan de eşkerayîyan danê. Nê çend raşt ê?

Dewleta tirka ke rixmê heme îmkanan û hêrişanê xo nêeşekana vera xoverdayîşê gerîlayan aver şiro, vînkerdişê xo bi zûran niminena. Hetêkî ra vanê înan gerîlayî qedînayî, hetê bînî ra wezîrê şerê taybetî Hulusî Akar vano  înan 19 herzar gerîlayî şehîd kerdî. Pê fekê vanê ke PKK senî gird o, bi des hezaran artêşî nayî ro. Xora wezîrê karanê zereyî yî zî zûranê winayên rê dewam keno. La ê zî zanê ke hinî çew pê înan nêxapîyeno. Senî ke medyaya tirkan pê xeberanê zûran wazenê şarî bixapîno medyaya pabesteyê PDKyî zî bi nê xebaran wazenê şarê kurdî bixapîno. Dewleta tirke  têna deheqê şehdatê gerîlayan de zûr nêkena eynî wextî de merganê xo zî nimnena. Tewr peynî leşkero bi nameyê Sezaî Gongurî ke waş teslîm bibo hetê artêşa tirke ra ame kiştene la medya de qet qala ci nêameye kerdene. Înan Garê de zî esîrê xo kiştî. Wa bêro zanayene ke no zîhnîyeto faşîzan çirey raşt nêvano.

Xelîfan de di grûbê gerîlan dîyayî dame ro. Şima PDKyî ra eşkerayîye waşte. Derheqê nayî de zanayîşêko newe esto?

Semedê gerîlayanê ke Xelîfan de  ameyî şehîdkerdene PDKyî ra hema yew eşkerayîya nêameye.  Ma nê hêrişî wîjdan û teqdîrê şarê xo rê verdayî.

Reyna sere de Dînartê tay serebutan ra  gerîlayan berpirsîyar vîneno. Bi nê metodanê şerî tatybetî çi wazeno?

Ça de çi bibo erzenê ma ser. Nê vatişî raşt nîyê. Çîyê ke gerîlayan nêkerdî kenê milê înan û wazenê biancê mîyanê muneqeşeyê winayênî. Dormeyê gerîlayan genê, rayîranê ci birnenê û ci rê daman nanê ro ke înan tehrîq bikerê û biancê mîyanê pêrodayîşî. Ma verî zî vatbi. Sey yew hetî hêriş yeno kerdene. Ma zanê ke no sîyaset dewleta tirke yo ke kurdan bi destê yewbînan bidê kiştişî. Pê nê xeberanê ke raşt nîyê wazenê gerîlayan biancê mîyanê pêkewtişan.

.