Merkezê Îrtîbatî û Çapemenîye yê HPGyî (HPG-BÎM) da zanayene ke menga tebaxe de di gerîlayê bi nameyê Xebat û Şoreşî netîceya bombardumanî de şehîd bîyî. Eşkerayîye wina ya:

''Embazanê ma Xebatî û Şoreşî xeylêk waranê Botanî de wezîfeyî û mesuldarî girewtî xo ser, rixmê pêro polîtîkayanê şerê taybetî yê dewlete Botan de pratîkê serkewteyê ke dişmen qehr kerd, ardî ca û 24ê tebaxa 2021î de warê Serê Ormanî yê herêma Kêla Memê yê qezaya Elkê yê Şirnexî de netîceya bombardumanê artêşa tirke ya îşxalkere de şehîd bîyî.

Nasnameyê embazanê ma wina yê:

Nameyê Qodî: Xebat Leheng Name û Peyname: Firat Firat Cayê Bîyayîşî: Riha Maye-Pî: Îde – Mehmet Hakki Tarîx û Cayê Şehadetî: 24ê Tebaxa 2021î / Kêla Memê

Nameyê Qodî: Şoreş Gilîdax Name û Peyname: Turan Kisak Cayê Bîyayîşî: Îdir Maye-Pî: Goge – Mahîr Tarîx û Cayê Şehadetî: 24ê Tebaxa 2021î / Kêla Memê

Embazê ma Xebat Riha de dadîya xo ra bîyo. Ey netîceya cigêrayîşanê xo de verê xo da koyanê Kurdîstanî.  Embaz Xebatî çarçewa felsefeya Rayberîye de tim xîret kerd ke xo aver bero. Embaz Xebatî tim waşt ke herêma Botanî de têkoşîn bikero û xîretê îşxalî yê dişmenî pêç kerdî. Embaz Xebatî tim xo sey deyndarê şarê xo, şehîdan û têgêrayîşî hîs kerd coka tim waşt ke bibo layîqê înan. Ey qetî kesayetê xo yê mutewazî û kedkarî ra tawîz nêda, bi nê hawayî bi milîtanêko mîsal ê Apogîrîye.

Embaz Şoreş Îdir de dadîya xo ra bîyo. Embaz Şoreşî ciwanîya xo de tewrê xebatanê şorişî bi û 2012 de hesreta xo arde ca, tewrê gerîlayan bi. Embaz Şoreşî wextê hêrişanê DAÎŞî yê vera Şingalî de bi hawayêkê aktîfî vera  fermanî têkoşîn kerd. Embaz Şoreş 2017 de reyna agêra herêma Botanî û têkoşînê xo rê dewam kerd. Ey wextê xoverdayîşê xoîdarekerdişî de hêrsê vera dişmenî kerd pîlêr û çalakîyanê Botanî de pê nê hêrsî xîret kerd ke qesas bigêro. Embaz Şoreşî Botan de rayberîya xeylêk çalakîyan kerde û derbê giranî dayî dişmenî ro.

Sere de keyeyanê ercîyayeyan ê embaz Xebat û Şoreşî rê ma şarê Îdir û Riha rê û pêro şarê welatperwerî yê Kurdîstanî rê serweşîye wazenê. Ma reyna anê ziwan ke do sozê xo yê serfîrazîya ke ma dabi şehîdan bîyarê ca.''