Merkezê Îrtîbatî û Çapemenîye yê HPGyî derheqê hêrişê PDKyî de  eşkerayîye daye û nê vatî:

Ma hesîyayê pê ke 7 kesan ra grûbêka ma herêma Xelîfanî de gama ke Awa Zapî ra şîyêne weverî hetê hêzanê PDKyî ra ginayî dame ro û hêriş de ameyî tasfîyekerdene. Tewirê wina xirabin ê PDKyî ra xirabêr yewna çî nêbeno. Eleqaya nê bi kurdîye çîn a. No hêriş ziraro pîl dano dewaya azadîye ya şarê Kurdîstanî. Eşkera yo ke îdareyê PDKyî hêzanê xo dormeyê hêzanê ma de ca keno ke ma bidê înan ro.  Seba ke ma pê hîsgêrîye têgerayî hû nêda piro, narey înan hêzê ma dayî dame ro. Bi nê hêrişan wazeno ke prosesê pêkewtişan bido destpêkerdene.

Ganî heme şarê Kurdîstanî  Barzanî û îdareyê PDYî ra nayî biperso:  Pêkewtişê mabênê kurdan ra û rişnayîşê gonîya ciwananê kurdan şima çi kewno destê şima. Nayî ra qezencê şima çî yo?  Qey şima semedê destpêkerdişê pêkewtişê mabênê kurdan israr kenê?  Seserra 21. de pêkewtişê mabênê kurdan ameyoxê şarê ma tarî nêkeno? Şar û dostê ma ganî nînan PDYî ra bipersê.

Dewleta tirke Îmrali de vera Rayberîya ma û heme zîndanan de vera hemrayanê ma îşkence kena û her ca de hêrişê şar û hêzanê  ma kena.  PDK zî hêrişê qikerdişî yê dewleta tirke yê vera kurdan rê hemkarî keno. Ma nê edalet, wîjdan û teqdîrê şar û rayapêroye  rê verdenê.''