Merkezê Îrtîbatî û Çapemenîye yê HPGyî nasnameyê 3 gerîlayanê ke Cûdî û Kato Jîrka de şehîd bibî eşkera kerdî. Eşkerayîye wina ya:

''14-18ê tebaxe de waranê Cûdî û Kato Jîrka de bombardumanê dewleta tirke ya îşxalkere de embazê ma Helo, Jînda û Rojîne şehîd bîyî. Her hîrê embazê ma zî asta rayberîye de tewrê hemleyanê şorişgêran ê herêma Botanî bîyî û înan tim xîret kerd ke erk û mesuldarîyanê xo bi hawayêkê tewr başî bîyarê ca.

Nasnameyê embazanê ma yê şehîdan wina yê:

Nameyê Qodî: Helo Mahabadî Name û Peyname: Mûhammed Alîzade Cayê Bîyayîşî: Mahabad Maye-Pî: Amî-Alî Tarîx û Cayê Şehadetî: 14ê Tebaxa 2021î /Cûdî

Nameyê Qodî: Jînda Berat Cîhan Name û Peyname: Nûrcane Çîntan Cayê Bîyayîşî: Wan Maye-Pî: Ayşe-Omer Tarîx û Cayê Şehadetî: 18ê Tebaxa 2021î /Cûdî

Nameyê Qodî: Rojîne Amed Name û Peyname: Fîdane Kûtpinar Cayê Bîyayîşî: Wan Maye-Pî: Hedîye-Kulî Tarîx û Cayê Şehadetî: 14ê Tebaxa 2021î /Cûdî

Embaz Helo Mahabad de dadîya xo ra bîyo û Komployê Mîyanneteweyî yê vera Rayberîya ma ra dima 210 de tewrê gerîlayan bi. Ey ruhê yewîye asta tewr berze de temsîl kerd û bi hawayêkê bêmabênî têkoşîn kerd. Embaz Helo tewr peyên Botan de bi fermandar û vera hêrişanê îşxalî xo ver da, derbê giranî dayî dewleta îşxalkere ro. Mîraso ke embaz Heloyî pê keda destê xo afernayo têkoşînê ma de tim do bidîyo dewamkerdene.

Embaze Jînda Wan de dadîya xo ra bîya û hema ciwanîya xo de a tewra gerîlayan bîye. Embaze Jînda tim xeta azadîya cinîyan ser o bêteredut şîye û bîye milîtanêka raybere. Embaze Jînda pê fedakarî û keda xo wextêkê kilmî de bîye fermandar û pê tecrubeyanê xo bîye gerîlayêka xurye. Embaze Jînda tewr peyêne Botan de erk û mesuldarîyê xo ardî ca, her çalakîye de ser kewte. Embaze Jînda do rayraşîyayîşê serfîrazî yê şarê ma de rayîrê ma roşnî bikera.

Embaze Rojîne Wan de dadîya xo ra bîya û vera hêrişanê îşxalî tewrê xoverdayîşê gerîlayan bîye. Embaze Rojîne sey gerîlayêka cinîye felsefeya Rayberîye aver berde û wextêkê kilmî de a bîye fermandarêka xurte û wayîra tecrubeyêka xurte. Aye mîyanê pêro şert û mercananê giranan de zî têkoşînê azadîye temsîl kerd.  Embaze Rojîne pê perwerîya xo ya bi Rayber Apoyî û şehîdan şinasîyayêne. Xeta aye tim têkoşînê ma de do dewam bikera.

Embazanê ma Helo, Jînda û Rojîne vera hêrişanê tasfîyekerdişî yê dewleta tirke ya îşxalkere Botan de bi hawayêkê fedayî xo ver da, armancê îşxalkeran rijnayî. Sere de keyeyanê înan ê ercîyayeyan ma pêro şarê welatperwerî yê Kurdîstanî rê serweşîye wazenê. Ma reyna soz danê ke qetî ma do serfîrazîya ke şehîdî ma ra pawenê bîyarê ca.''