Hemserekê DBPyî yê Amedî Garîp Kandemîr ard ziwan ke tecrîdê Rayberê Şarê Kurdî Abdullah Ocalanî vera pêro Rojhelatê Mîyanênî yo û vat: ''Dewlete bi hêrişan cewab da vengdayîşê Birêz Ocalanî yê seba haştîye. Bi nê hawayî rîyê xo eşkera kerd.''
Hemserekê Partîya Herêmanê Demokratîkan (DBP) yê Amedî Garîp Kandemîrî derheqê tecrîdê Rayberê Şarê Kurdî Abdullah Ocalanî de ANF reyde qisey kerd.
Kandemîrî ard ziwan ke tecrîdê Ocalanî zerar dano Rojhelatê Mîyanênî û vat: ''Na polîtîkaya tecrîd têna vera kurdan ney vera Rojhelatê Mîyanênî zî tehlukeyêko pîl o. Awankerdişê komare ra nata vera kurdan polîtîkaya qirkerdişî yena xebitnayene. Rayber Apoyî zaf reyî waşt ke na mesele bi demokrasî û haştîye çareser bikero. La heyf ke seba ke hukmat îqtîdarê xo dewam bikero polîtîkaya xo ya şerî vist dewre. Hewceyê Rojhelatê Mîyanênî bi proje û modelê çareserîye yê Rayber Apoyî esto.
Birêz Ocalan muzakereyan û pêvînayîşan de seba ke atmosferê haştîye û aramîye bêro awankerdene aktorê serek o. Coka 21 serr ê ke Zîndanê Îmraliyî de tecrîdêko giran esto. Bi tecrîdê Ocalanî hukmat wazeno estbîyayîşê xo dewam bikero. Eke mesela kurdan bêra çareserkerdene û Tirkîya aram biba û biresa haştîye no hukmat zî do birijo.Heta ke tecrîd nêqedo rewşa Tirkîya aram nêbena. Bi caardişê Îmraliyî AKP-MHPyî peymananê mîyanneteweyîyan y-ê derheqê heq û azadîyan de binpay kenê.
Rayber Apoyî reyêk vat: 'Eke eqlê dewlete têbigêro ma eşkenê na mesele hewteyêk de çareser bikerê. La eqlê dewlete tênêgêra. Vera vengdayîşê haştîye yê Ocalanî bi tayînkerdişê qeyûman, bi îşxalê Rojawanî cewab ame dayene. Dewlete rîyê xo reyna eşkera kerd.''
