Fermandarê Qerargehê Merkezê Pawitişê Şarî (MPŞ) Murat Karayilanî bêtelî ra xîtabê hêzanê gerîlayan kerd. Karayilanî qiseykerdişê xo de bale ante nê xususan ser:

''Têkoşînê ma kewto prosesê tewr muhîmî yê tarîxê xo. Vera hêrişê topyekunî yê rejîmê AKP-MHP û Ergenekonî xoverdayîşê ma kewt merhaleyêka muhîme. Seke yeno zanayene nê rejîmî vera têkoşînê azadîye planê çokdayîşî amede kerdbi. Bi nê planî ameyêne waştene ke Têgêrayîşê Azadîye bêro tesfîyekerdene û şarê ma bêro qirkerdene. Dewleta tirke seba ke bireso hedefê xo hem komployê mîyanneteweyî newe ra fîna dewre hem zî  endamîya xo ya NATOyî heta peynî şuxulna.

Konseptê şerî ser nêkewt

Konseptê şerî de sere de Rayberîye û gerîlayî ameyî hedefgirewtene. Bi zextanê faşîzan ame waştene ke Vakurê Kurdîstanî de verê têkoşînî bêro girewtene. Dimara şorişê Rojawanî û Şingal de xoverdayîşê êzidîyan ameyî hedef girewtene. Dişmenî planê hêrişê ke fînayî dewre nêeşka ser bifîno. Dewleta tirke bin kewte. Coka ewro krîzo xorî de ya. Hinî pêro zanê ke peynîya nê rejîmî ameya. Nê rejîmî waşt ke ma biqedîno la nêeşka. Nika o bi xo ameyo merhaleya qedîyayîşî.

Gladîoyî teknîkê şerî da Tirkîya

Bitaybetî 6 serranê peyênan de vera Rayberîye, hemrayanê ma yê ke zîndanan de yê, Gerîlayanê Azadîye, şarê ma û vera hêzanê demokrasîyî hêrişê giranî ameyî kerdene. Eslê xo de NATO 15ê Tebexa 84î ra nata nêwaşt ke dewleta tirke vera gerîlayan bin bikewo. Coka îlankerdişê adirbirnayîşî qebul kerd. Nê mabênî de hem Tirkîya de hêzêko paramîlîter rêxistine kerde hem zî bi paştdayîşê Gladioyî teknolojîyê dewrî da dewlete û artêşa tirke. Nînan ra tay dîrek da, tay zî seba ke rayrapêroyîye nêrazîbîyayîş nêmojno, bi metodanê cîya cîyayan ameyî dayene. Her welatî bi yew perçe û formul da. ÎHA û SÎHAyî  wina dîyayî dewleta tirke. Erodan nika xo wasifneno vano ma nê viraştî. La ma zanê ke her parçeyê înan hetê yew dewlete ra ame dayene, înan rê ame musnayene û dîya kerdene.

Bi îradeyê pîlî ame xoverdayene

Înan vat qey pê nê tekonolojîyî cade hêzanê ma çîn kenê. Na çarçewe de hêrişê hîrayî ameyî kerdene. Hêzanê Azadîye yê Kurdîstanî vera nê hêrişan têkoşîno tarîxî kerd. Sere de Rayberîya ma Îmrali de xoverdayîşo bêhempa mojna. Reyna bi xoverdayîşê heme zîndanan, xoverdayîşê warê sîyasetê demokratîkî  û xoverdayîşê şarê fedakarîya pîle ameye mojnayene. Bêşik xoverdayîşo tewr pîl warê şerî de qewimîya. Hem Vakurê Kurdîstanî hem zî Herêmanê Pawitişî yê Medya û parçeyanê bînan de destanê tarîxî ameyî nuştene. Pê qale çew nêeşkeno nê xoverdayîşan bîyaro ziwan. Nê xoverdayîşê ke bi bawerî û qerardarîya pîle ameye kerdene de bedelê pîlî ameyî dayene. Proses bi îrade û fedakarîya pîle ame rayraberdene û yeno rayraberdene.

Planê îşxlakeran ê 2021î bin kewtî

Bado ke hêzanê komplokeran dîye ke dewleta tirke ser nêkewna, hina aktîf kewtê dewre. Na çarçewe de bi komployî Rojawan de Efrîn, Serêkanîyê û Girê Sipî ameyî îşxlakerdene. Reyna xeta xayînîye ya kurdan ameye aktîfkerdene û Kurdîstan de verê ajananê MÎTî zafer ame akerdene û nê ajanî her ca de ameyî cakerdene. Parekerdişê îstîxbaratî ame averberdene. Nê hêzê ke rixmê nê pêrune ser nêkewtî  2021 de Herêmê Pawitişî yê Medya kerd hedefê xo. Semedê nayî zî PDK sey hamkare û hukmatê Iraqî zî seba ke bêveng bimano hazir kerdî. Waşt ke sey komployê 15ê Sibate hêrişêko newe bikerê û Têgêrayîşê Azadîye çîn bikerê.

Menga sibate de vera Garê nişa hêrişêk ame kerdene. Ame waştene ke merkezê gerîlayan bêro tesfîyekerdene. La seke yeno zanayene ke serkêşîya fermandar Şoreş Beytuşşebabî de xoverdayîşê Garê planê înan pûç vetî. Dima ra 23ê nîsane de vera  Avaşîn, Zap û  Metîna hêrişan dest pêkerd. Înan vat qey pê îmkananê teknîkê xo ser kewnê la hesabê înan reyna xelat vejîyayî. Bi mengano nêeşkenê vera xoverdayîşê gerîlayan de aver şirê. Tay cayan de hêzê îşxalî ca bikerê zî ê herême de hakîm nîyê. Seba ke tîya tengayî ancenê hêzê PDKyî fînayî dewre ke tîya ra bixelisîyê.  La rixmê naye zî hema netîce nêgirewto û ver bi binkewtişî şinê.

Mîrazê şerî bawerî, îdeolojî û qerardarîye yê

Rayber Apo vano teknîko tewr pîl merdim o. Hêzê ma yê ke bi na raştîye têgêrene vera teknîkî çalakîyanê xurtan kenê. Teknolojî zafêr xizmetê îstîxbaratî keno. Dewre ma de hinî şeran de îstîxbarat cayo merkezî geno. Rîyê teknolojî ra îstîxbarat bihêz beno. Dewrê newî de hîrê faktorê şerî vejîyenê vernî, merdim, îstîxbarat û teknîk. Roja ma de kam ke na raştîye rind nêvîno, prosesî raşt mewano şer de ser nêkewno. Nimûneyo  tewr pîl ê naye artêşa Ermenîstan a. Heme şaran de nimitîye û dîsîplîn cayo muhîm genê. La roja ma de  û bitaybetî zî şerê gerîlayan de nê zafêr muhîm ê. Semedê nînan faktorê biqabîlîyetî yê merdimî hewce kenê. Hêzo ke bawerîye û îdeolojîya ci çîn a çeka ci ya tewr xurt  û maaşê ci ya zaf berze bibo zî şer de nêtîce nêgeno. Rojanê peyênan de ma nimûneyî nayî ma Afganîstan de dî. Artêşa Afanîstanî ke Amerîka perwerde kerde û çekê modernî dayî ci verê têgêrayîşê Talabanî de sey cemedî helîyaye. Çunke têna yew mîrazê şerî ya zî sermayeyê ci esto. O zî îdeolojî yo, bawerîye û qerardarîye ya. Ma nika pratîk de mojnenê her kesî ke îrade û qabîlîyetê merdimî vera teknolojîyê dewrî ser kewno. Ma nika Herêmanê Pawitişî yê Medya de naye kenê. Eslê xo de ma heme waranê gerîlayan de kenê ke naye aver berê. Ma Kurdîstan de game bi game kenê ke na raştîye vejê werte.Têgêrayîşê Talabanî pê şerê xo no fîna çiman ver. Îdeolojîya têgêrayîşê Talîbanî ma hetêk de verdê la Afganîstan de ame vînayene ke şer de têgêrayîşê şarî vera teknîkî ser kewnê.

Têkoşînê têgêrayîşê ma têna seba şarê kurdî nê seba pêro şarê herême û merdimîye vurîyayo têkoşînêkê girîngî. Têkoşînê Azadîye yê Kurdîstanî mojna her kesî ke îrade û marîfetê merdiman her tewirê teknîkî ra pîlêr ê.Nê pêro bi rehetî nêbîyî. Xêrê xoverdayîşê milîtanan ê çêran û erjanê Rayber Apoyî ra bîyî.Têna pê fedayîyanê Apogîran no proses yeno caardene. Çîyager, Xebatkar û Zeryayan ra heta Soro, Azad, Çekdar û Berçeman, Delal Amed, Atakan Çetîn û Doganan ra heta Welat, Çavreş û Şervînan no têkoşîn ame kerdene. Serranê peyênan de xêrê şorişgêranê pîlan Alî Piling, Çîçek Botan, Yilmaz Dersîm, Zîn Cîzre, Agît Civyan, Dilşêr Herekol, Hevram, Amara û Nûjînan ra no pratîk û proses îdare benê.

Têgêrayîşê mîlîtananê fedakaran çirey bin nêkewno

Xêrê milîtanan ra ke ewro bi hawayêkê gandarî bi çêrî û fedakarî Werxelê û Girê Sipî de xo ver danê, xêrê bazanê Avaşîn, Zap û Qaşûra ra na raştîya tarîxî zêdêr eşkera bena. Na raştîya xoverdayîşê fîrazî ya milîtananê PKKyî û tewiro qerardar ê serkewtişî hem tesîrê komelê Kurdîstanî hem zî tesîrê ma kena. Roja 20. ya xoverdayîşê Zendûra de fermanê xoapeyantişî dîya embaz Hêjarî rê la nê embazê ma yê rayberî vat 'Birîndarêkê ma esto, rewşa ci giran a, nêeşkeno şoro. Ez hetê ci de bimana, heta peynî şer bikera la embazê bînî wa xo apey biancê.' Embazanê înan ê bînan zî apey nêant û xoverdayîşî rê dewam kerd. Nê esasî ser o destanê Zendûra yo tarîxî nusîya. Mîyanê 2 mengan de bi fedakarîyêka pîle înan xo ver da. Tunelê Aris Farisî de embaze Dîyana zî heman tewir mojna û îsbat kerd ke ganî milîtanîya Apogîre senî bêra kerdene.

No tewir merdimîye rê ercîyaye yo. Heta ke milîtan û fedayîyê winasênî estbê no têgêrayîş qetî bin nêkeweno. Eke embazê embazan pratîk de semedê embazanê xo wina têbigêrê hînî rayîrê embazîye de resenê astêka girînge. No semedê ma pêroyînan krîterêko bingeyî yê pratîkî yo. Oyo ke Fermandar Xebatkarî xoverdayîşê Nisêbînî de mojna, tewiro fedayî yê Apocîyan o ke Çîyagerî tira vatêne 'se beno wa bibo netîce do bêhempa biba.' Embazanê winasênan reyde embazîye ma rê şansêko pîl o.

Ê vanê qey pê zûran eşkenê ser bikewê

Nika cergê dewleta tirke vanê 'Hînî çew tewrê înan nêbeno.' Hele şima ê kamerayan, polîsan rayîran ra wedarnê ma bivînê çend ciwanî yenê. Ê bi hezaran ciwanî rayîr de tepiştî û eştî zîndanan. Ê netîceya şerî zî pare nêkenê, kişteyanê xo nimnenê. Xeberê înan vanê 'hende kesî cîya bîyî û teslîm bîyî. La tewr tay nê serran de têgêrayîşê ma ra cîyabîyayîşî qewimîyayî. PDK kesê ke zereyê ma de ca kerdî wexto ke remenê keno xeber û şer keno xorin.

Pê zûran ê wazenê hîkayeyêka serkewtişî xo rê binusê û zulmê şarê ma bikerê. Her roje daristanî yenê vêşnayene. Nika Dêrsim û Botan de şewatê daristanan esto. Tirkîya daristanan vêşnena la têgêrayîşê ma sûcdar kena. Madem SÎHAyê şima hende xurt ê û leşkerê şima hende bihêz ê şima çira daristanan vêşnenê? Çergê çarî Tayyîp Erdogan, Devlet Bahçelî, Suleyman Soylu û Hulîsî Akar Kurdîstan de zulm kenê û wazenê têgêrayîşê azadîye tasfîye bikerê la ê do nêeşkê. Çunke PKK hînî bîyo komel. Ê semedê îqtîdarê xo gonîye rijnenê. Rayber Apoyî vatbi 'Firsend bidê ma ez do na mesele hewteyêk de çareser bikera.' La ê semedê sîyasetê qirkerdişî nê rayîrî nêweçînenê. La ê do tarîx de bêrê muhakemekerdene. Hesabê na gonî do bêro perskerdene. Nê cergê çarî do nêeşkê binê na bare ra wurzê wê û do hesab bidê.

Se kenê wa bikerê ê do Kurdîstan de bin bikewê

Ê muracatê metod û rayîranê gemarinan kenê, Kurdîstan de madeyanê kundoxan danê ciwanan, Herêmanê Pawitişî yê Medya de çeka kîmyewî xebitnenê. Semedo ke ser nêkewtî vera hêzanê YPG, YBŞ û YRKyî kerd, Şingal de nêweşxane da bombayan ver. Bi nê hawayî ê qanûnan binpay kenê la se kenê wa bikerê. Ê do tarîx de bêrê muhakemekerdene.

Têgêrayîşê Azadîye do ser bikewo, Kurdîstan de kolonyalîzm û faşîzm do birijê. Eke ê estbîyayîşê kurdan qebul bikerê eşkenê bixelisê. Ê hem vanê 'Ma PKK qedîna' hem zî vanê 'Rojawan de têgêrayîşo pîl ê PKKyî esto ke semedê Tirkîya tehluke yo.' Nê wird vateyî yewbînan nêtepişenê. Dewleta tirke nêeşkena pê na propaganda biresa cayêkî. Raştîya înan bi nê hawayî eşkera bena.

Ma 15ê tebaxa 2018î de vatbi ke 'Kêmasîya ma ya tewr pîle kêm û kurtîyê ma yê.' No têkoşîn ame kerdene la bi sebebê ereymendişî. Wextê xo de cayê ci de ma xeta gerîlatîye lez awan nêkerde û nêarde ca. Ma na mesuldarî her kesî rê bare nêkenê. Xora sere de ma mesuldar ê. Oyo ke zor dano ma hêrişê teberî nê hêrişê zereyî yê dişmenî yo. Şarê ma vano 'kermê dare dare ra yo.' No vate zaf girîng o. Xora key ma biewnê tarîxê xoverdayîşê kurdan ma vînenê ke pêro têgêrayîşê kurdan pê derbanê zereyî rijîyayî.

Nê hetî ra nika ma zaf baldar ê. Zaf girîng o ke şarê kurdî bibo yew. Dişmen xîret keno ke yewîya ma bixeripno û şerê zereyî vejo. Çunke ma tarîx de tim nê semedî ra bin kewtî. Pê îdeolojîya Rayberîye pêro hetan verî yewîye arde verê xo. Kurdîstan bibi çar parçeyî la Rayberîye heqê ney ra ameye. Yewîya neteweyî, yewîya ruhî astêka berze de ameyî caardene. Nika ma pê îdeolojîya Rayberîye û pê pawitişê nê ruhê embazîye no jehr xo ra veto.

Ganî hemrayê cinîyî prosesî rê bibê cewab

Bi taybetî lazim o ke hêzê cinîyan bêrê ercnayene û cinîyî bieşkê xo raşt biercnê. Heto tewr balkêş û girîng ê felsefeya Rayberîye yo ke ey raştîya cinîyan dîyo û veto werte. Hînî cinî û ciwanî rayberê şorişî yê. Xeylêk embazê ma yê cinîyî yê milîtanî mîyanê şertanê zoran de bara tewr girane gênê xo milî û xîret kenê ke Rayberîye rê bibê cewab. Ma zî heta peynî peyê nê embazan de yê. Ganî embazê cinîyî pê xo bawer bikerê, kokê xo ser o xo îdare bikerê, têkoşînê îdeolojîk, rêxistinî û leşkerî bikerê û pê tewirê xo yê qerardarî cewab bidê prosesî.

Çarevînayîşê her perse Apogîrîye de metodêko sereke yo. Neçareserîye qetî nêna qebulkerdene. Felsefeya Apogîre de neçareserîye çin a. Milîtanê Apogîrî kamca de bibê mesuldar ê ke persan rê bibê cewab, xo mesuldar bivînê û na perse goreyê xeta ma çareser bikerê. Milîtanê Apogîrî kamca de bibê zî wexto ke hewce keno benê general.''