Komîteya Perwerdeyî ya KCKyî semedo ke Efrîn de kurdkî bernameyanê perwerdeyî ra ameye vetene eşkerayîyêke daye.

Eşkerayîye wina ya:

''Seke zanîyeno dewleta tirke ya îşxalkere û qirkere vera şarê ma sîyasetê çinkerdişî û qirkerdişî ana ca û semedê servisnayîşê nê sîyasetî sînor, erj û krîteranê merdimîye qet nêşinasnena. Coka hêrişê destkewteyanê şarê ma kena. Dewleta tirke nêverdena ke şarê ma komelê mîyanneteweyî de bişinasîyo û pê pêro metodan hêrişê şarê ma kena. Hêrişanê fîzîkîyan reyde pêro metodanê asîmîlasyonî û qirkerdişê kulturkî vera şarê ma ana ca.

Şarê ma yo rûmetên û ercîyaye;

Sere de dewleta tirke ya îşxalkere dişmenê şarê ma pê nê hêrişan wazenê reyna nameyê kurdan û Kurdîstanî ser o çîyêk nêverdê. Seke zanîyeno oyo ke eşkeno ney asteng bikero têgêrayîşê azadîye yo. Rixmê pêro hêrişanê barbaran ê vera têgêrayîşê azadîye ê nêeşkenê nê armancê xo bîyarê ca. Coka pê metodanê şerê taybetî têgêrenê. Ê vateyanê sey 'Kurdî way û birayê ma yê, meseleya ma bi kurdan çin a, armancê na têna PKK yo' vejenê vernî. La dost û dişmenî zanenê ke PKK çar parçeyanê Kurdîstanî de îradeyê şarê kurdî yo. Coka semedo ke şarê ma qir bikerê verî wazenê PKKyî çin bikerê. Rixmo ke raştî hende eşkera ya tay hêzê kurdî yê sey PDKyî hemkarî û embazîya înan kenê. Wa baş bizanîyo ke na embazîye dişmenî ra zêdêr zerar dana waştiş, destkewte û dewaya azadîye ya şarê ma.

Şarê ma yo rûmetên; seke şima zî zanenê sere de dewleta tirke dişmenê şarê kurdî nêwazenê destkewteyanê ma estbê. Coka her ca de hêrişê kurdan kenê. Na raştîye pê hêrişanê vera Vakurê Kurdîstanî, Kerkûk, Mexmûr, Şingal, Kobanê, Efrîn, Girê Sipî, Serêkanîyê û Herêmanê Pawitişî yê Medya xo îsbat kena. Nê hêrişî bêguman pê îtîfaqanê herêmîyan û mîyanneteweyîyan yenê kerdene. Êyê ke vanê 'Nê hêrişî vera PKKyî yê vera kurdan nîyê' hemkarê dişmenê kurdan ê. Nê hêz û kesê hemkarî hemparê sîyasetê qirkerî yê vera şarê ma yê.

Şarê ma yo ercîyaye; seke şima zî zanenê dewleta tirke ya îşxalkere û cergê ci vera Rojawanê Kurdîstanî hêrişanê barbaran kenê. Netîceya nê hêrişan de Efrîn, Girê Sipî û Serêkanîyê ameyî îşxalkerdene, bi hezaran kurdî ameyî qetilkerdene û bi se hezaran kurdan koç kerd, dest nîya mal û mulkanê înan ser. Dewleta tirke û cergê ci nê cayan de remnayîş, tacîz, tecawuz, îşkence, tepiştiş û kiştişê şarî rê dewam kenê. Cerg û keyeyanê cergan reyde bi hezaran tirkmen, ereb ûsn nê cayan de ameyî cakerdene. Neteweyê Yewbîyayeyî vera nê sûcanê merdimîye de bêveng ê. Dewleta tirke na bêvengîye ra cesaret gêna û demografîya herême vurnena. Dewleta tirke qirkerdişê fîzîkî reyde qirkerdişê kulturkî yê kurdan zî armanc kena. Tewr peyên Efrîn de înan bernameyanê perwerdeyî ra ziwanê kurdkî bi temamî vet. Dewleta tirke hem ware û cayê kurdan îşxal kerdî hem zî tede ziwanê kurdkî qedexe kerd. Verê çimanê pêro dinya de şaristan û qezayanê ma de tirkî û erebkî sey ziwanê fermî qebul bîyê û domananê kurdan rê yenê ferzkerdene. Dewleta tirke wazena şarê ma hetê kulturkîyî ra zî qir bikera. Bêguman şarê ma yo rûmetên ney tesdîq nêkero û vera ci xo ver bido.

Şarê ma yo ercîyaye û rûmetên; sere de dewleta tirke ya îşxalkere dişmenê kurd û Kurdîstanî pê nê kerdişanê vera merdimîye wazenê estbîyayîşê ma werte ra wedarnê. Pê nê kerdişan dişmenî estbîyayîşê şarê ma nêşinasnenê û semedê qirkerdişê şarê ma pêro firsendan şuxilnenê. Reyna eşkera bîyo ke vateyê 'kurdî way û birayê ma yê, ma vera PKKyî yê' zûrêko pîl o. Xora semedo ke PKK verê armancan û plananê înan de asteng o wina PKK kenê bahane. Dost û dişmenî hol bizanê ke heta ke PKK estbo planê qirkerdişî yê vera şarê ma do ser nêkewê. Eqsê ci pê ruhê xoverdayoxî yê têgêrayîşê azadîye rayraşîyayîşê şarê ma yê azadî û demokrasî roje bi roje do ser bikewo.

Ma sey Komîteya Perwerdeyî ya KCKyî pêro kerdiş û hêrişanê vera şarê ma red kenê û bi hawayêkê xurtî nînan şermezar kenê. Ma reyna venga şarê xo danê ke vera nê sîyasetê qirkerdişî hişyar bibê û bi her hawayî têkoşînî geşêr bikerê.''