Hemserekîya Konseya Rayberdişî ya KCKyî pare kerd ke dewleta tirke 5 mengî yo vera gerîlayan çekanê kîmyewîyan û gazê jehrînî xebitnena la Neteweyê Yewbîyayeyî, Ewropa û Amerîka vera ney bêveng ê. Hemserekîye vera şuxilîyayîşê çeka kîmyewî semedê serewedaritişî veng da.

Derheqê babete de eşkerayîya Hemserekîya Konseya Rayberdişî ya KCKyî wina ya:

''HPG nêzdîyê 5 mengî yo rayaumûmîye rê eşkra keno ke dewleta tirke vera waranê gerîlayan çekanê kîmyewîyan û gazanê jehrînan xebitnena. Na babete de tay dîmenî zî weşanîyayî. Kolonyalîzmo qirker her ke teng beno û zehmetîyan anceno vera gerîlayan çeka kîmyewî xebitneno. Çekê kîmyewî û gazê jehrînî erzîyenê mîyanê şikefteyanê verî tesbît kerdo. Nê şerê dormeyê tunelan ê 5 mengan de semedo ke ê gerîlayan çin bikerê û xo biresnê tunelanê şerî her tewirê çekanê kîmyewîyan û gazanê jehrînan xebitnenê.

Rixmo ke HPG eşkerayîyan dano û bi israr pare keno ke artêşa tirke çekanê kîmyewîyan û gazanê jehrînan xebitnena, bi nê hawayî sûcê şerî kena, dewletêke yan zî dezgehêko mîyanneteweyî tênêgêrenê. Hêzê sîyasî yê sey Ewropa û Amerîka, dezgehê sey Neteweyanê Yewbîyayeyan wexto ke babete welatê bînî bibê çekanê kîmyewîyan û gazanê jehrînan kenê rojdem. Labelê wexto ke babete hemkarê ci bibê sûcanê winasênan nêvînenê, vera ci tênêgêrenê. Bi nê hawayî mojnenê ke babeta dûştîya çekanê kîmyewîyan û jehrînan de samîmî nîyê, bi têdûştî tênêgêrenê.

Neteweyeyê Yewbîyayeyî, Ewropa, Amerîka û xeylêk welatî wexto ke babete bena Tirkîya têna menfaatanê xo fikirîyenê. Tirkîya kurdan qir kena, teda û zulmêkê giranî kena, şarê xo rê dîktatorîye ferz kena la nê semedê înan girîng nîyê. Dewleta tirke ya qirkere nê tewirî ra cesaret gêna û bi her hawayî kurdan rê zulm kena, kerdişanê vera merdimîye kena. Tirkîya kam ke vajo ez kurd a û vera asîmîlasyonî werişto we erzena zîndanan! Xora xeylêk wekîl, hemşaredar û endamê Meclîsê Şaredarîye ameyî tepiştene. Warê nezaretî vurîyayê cayê îşkence, teda û tecawuzî. Pê na teda û zulmî pê gefê zîndankerdişî dewleta tirke şarê xo rê ajanîye û îxanetî ferz kena.

Îqtîdarê AKP-MHPyî rixmo ke bi her hawayî sûcê merdimîye kena zî Ewropa û Amerîka rê bena muxatab û tira paştdayîşê leşkerî, sîyasî û dîplomatîkî gêna. Îqtîdarê AKP-MHPyî zî pê nê paştdayîşî zulmê vera kurdan û şaranê Tirkîya kena giranêr, Rojawan û Şingalî rê gefê îşxalî wanena. Vera Kampa Mexmûrî zulmê xo rê dewam kena. Sûcanê vra kurdan û şaranê Tirkîya de Ewropa, Amerîka û Neteweyê Yewbîyayeyî hemkarê sûcî yê. Ganî şarê kurdî, şarê dinya, hêzê demokrasî na raştîye bizanê.

Artêşa tirke her roje pê teyarayanê şerî, helîkopteran, tank û topan adir verdena daristananê Kurdîstanî, xozaya Kurdîstanî talan kena la seke no heqê dewleta tirke yo têna nê kerdişî yenê seyrkerdene. Seke vera gerîlayanê PKKyî şuxilîyayîşê çekanê kîmyewîyan û gazanê jehrînan serbest o tira veng nêno kerdene. Raşta zî hînî semedê Ewropa, Amerîka û Neteweyanê Yewbîyayeyan vate qedîyayo. Nê welatî semedê menfaatanê xo her tewirê erjanê merdimîye binpay kenê û bimnpaykerdişî teşwîq kenê.

Fermandarîya HPGyî çend rojî verî pare kerd ke vera tunelanê şerî yê Girê Sorî çeka kîmyewî, şuxilîyaye û 3 gerîlayî şehîd bîyê. A raşte gerîlayî pê maskeyanê gazî û tedbîran verê şehadetî gênê. Nêbo heta nika bi seyan gerîlayî nê hêrişan de şehîd bibîyêne. Yeqîna Ewropa, Amerîka û Neteweyê Yewbîyayeyî wazenê ke gerîlayî pêro pê gazanê jehrînan bikişîyê. Eke wina nêbîyêne înan eşkerayîyêke dayêne û dewleta tirke şermezar kerdêne. Amerîka, Ewropa û Neteweyanê Yewbîyayeyan bi wesîleyanê cîya-cîyayan pare kerdbi ke şuxilnayîşê çekanê kîmyewîyan û gazanê jehrînan înan rê xeta sûr a. Labelê nika tewirê înan eqsê ney o. Nê ke hîşyarkerdiş û mudaxele ê paştî danê dewleta tirke.

Eke hesabê înan wina nêbê vera şuxilîyayîşê çekanê kîmyewîyan, vêşnayîşê daristanan, zulmê vera kurdan û şaranê Tirkîya ganî ê vera Tirkîya têbigêrê. Ewropa, Amerîka û Neteweyê Yewbîyayeyî pê nêrazîbîyayîşê neheqîya vera çend kesan nêeşkenê bêexlqîya xo, bêwijdanîya xo û zûrkarîya xo binimnê.

Ma venga şarê kurdî, şaranê Tirkîya, hêzanê demokrasî yê Ewropa, Amerîka û pêro dinya, wayîrwijdanan, demokratanê NYyî danê ke vera şuxilîyayîşê çekanê kîmyewîyan ê serê gerîlayan wurzê payan ser û dewleta tirke ya ke vera merdimîye sûcan kena muhakeme bikerê...Ma pê bawer ê ke Trîbunal (Mehkemeya Trîbunalî 20-24ê êluel de Cenevre de roniştişan ra dima bira xo eşkera bikera) gamanê girîngan bierzo.

Îqtîdarê AKP-MHPyî vera şarê kurdî û merdimîye sûcan keno coka do qetî bêro muhakemekerdene û hesab bido.''