Hemserekîya Konseya Rayberdişî ya KCKyî eşkerayîyêka serê xoza û şewatan daye. Eşkerayîye wina ya:

''Emser germîya zêde ya krîzê awhewayî û bêtedbîrîya hukmatê AKP-MHPyî ra Tirkîya de daristanan de şewat vejîya û xeylêk cayî vêşayî. Na raştîye mojna ke Tirkîya de têkoşîno ekolojîk çend girîng o û karêko lezabez o.

Kurdîstan de sey beşê şerê qirkerdişî yê vera kurdan daristanî yenê vêşnayene û destûr nêdîyeno ke bêrê hewnakerdeme. Kurdîstan de her serre daristanî yenê vêşnayene. Her hêrişê helîkopterî, her bombarduman beno sebebê şewatan. Netîce de Kurdîstan de cayêk nêmendo ke nêveşayo. Herêmanê Ege, Dengizê Sipî û Marmara de bi kêmî zî bo xîret yeno kerdene ke şewat bêro hewnakerdene. La Kurdîstan de destûr nêdîyeno ke şewat bêro hewnakerdene. Kurdîstan qestî ra yeno vêşnayene.

2021 de hêrişanê vera gerîlayan û şarê kurdî reyde şewatê vera daristanan zî zêdîyayî. Sere de Botan, Amed û Herêmanê Pawitişî yê Medya de her cayê Kurdîstanî de hêrişê pê helîkopteran, teyarayan û bombardunî şewat vet. Wextanê peyênan de Çewlîg, Amed, Sêrgt, Şirnex û Bedlîs de netîceya bombardumanê Tirkîya de şewat vejîya û bi hewteyan dewam kerd. Reya verêne şewatê Kurdîstanî na aste de kewte rojdem.

Dewleta tirke senî ke semedê tasfîyekerdişê têkoşînê azadîye yê kurdan dewî vêşnayî xera kerdî, bi mîlyonan merdimî dayî koçkerde b heman hişmendî adir verda daristanan. Pê vateyê 'Tirkîya de xîret yeno kerdene ke şewatê daristanan bêro hewnakerdene la çira Kurdîstan de xîret nêno kerdene' şarê kurdî bi xo zaneno ke dewleta tirke daristanan çira vêşnena.

Hetê bînî ra vateyê 'ma wina têgêrayî, ma do wina biqedînê' yê serekkomar, wezîranê karanê zereyî û pawitişî, xîretê herimnayîş û çinkerdişê cografyaya Kurdîstanî yê. Ê pê vêşnayîş û û wêrankerdişê cografyaya Kurdîstanî xîret kenê ke şarê kurdî teslîm bigêrê. Labelê hêrişê topyekûnî yê kolonyalê qirkerî hêrsê şarê ma pîlêr kenê. Netîceya têkoşînê şarê ma û hêzanê demokrasî de îqtîdaro faşîst AKP-MHP hê verê rijîyayîş de yo.

Xozaya Kurdîstanî warê cuye yê şarê kurdî yo. Daristanî zî cîgerê ci yê. Coka hêrişî vera cuya kurdan ê. Xozaya Kurdîstanî ra Botan bi xozaya xo waro tewr girîng ê Kurdîstanî yo. Nê cografyayî nika hetê dewleya tirke ya îşxalkere ra yenê çinkerdene. Dêrsim, Çewlîg, Amed û Bedlîs warê girîngî yê daristanan ê Kurdîstanî yê. Ferasetê endustrîyalîzmî yê modernîteya kapîtalîste dinya de xoza çin keno û beno sebebê vurîyayîşê awhewayî. Kurdîstan de kolonyalîzmo qirker wazeno kurdan qir bikero, Kurdîstan biherimno û xoza talan bikero. Coka têkoşînê Kurdîstanî têkoşînê vera qirkerdişî û wayîrvejîyayîşê xoza yo.

Rayber Apoyî semedê têkoşînê demokrasî û azadîye yê merdimîye, têkoşînê azadîya cinîyan û têkoşînê ekolojîk dîyarker dîyo. Hem seba wayîrvejîyayîşê warê cuye yê Kurdîstanî hem zî seba caardişê têkoşînê demokrasî û azadîye bi hawayêkê yewbîyayeyî ganî têkoşîno ekolojîk her ca de bêro rêxistinlerdene. No têkoşîn heqdar û meşrû yo. Ganî bizanîyo ke kolonyalîstî qestîr a waranê cuye yê şarê kurdî çin kenê.

Şarê ma semedê Dêrsimê xo, Botanê xo, Amedê xo, Garzanê xo, Çewlîgê xo û Serhedê xo ganî lezabez xo rêxistin bikero û têkoşîn geş bikero. Kurdîstan de zaf merdimê winasênî estê ke eşkenê nê têkoşînî bikerê. Xora şarê ma bi temamî semedê wayîrvejîyayîşê erdê xo yê cuye tewrê nê têkoşînî bibo.

Bêguman ça de şewatêk estbo ganî şarê kurdî xo rêxistin bikero û şewatî hewna bikero; vera êyê ke şewatî vejenê zî tewirê xo bimojno û bi nê hawayî verê şewatanê qirkerdişî bigêro.''