Hemserekîya Konseya Rayberdişî ya KCKyî derheqê hêrişanê PDKyî de eşkerayîye daye û nê vatî:

''PDKyî warê Xelîfanî de hêrişê grûbêka gerîlayan a ke tede gerîlayî estbî,  kerd. Dima ra 3 gerîlayan rê dame na ro û hêrişê înan kerd. HPGyî eşkera kerd ke hêrişê Xelîfanî de 7 gerîlayî şehîd bîyî.  Reyna Metîna de zî 7 xoverdayoxê Zendûra pê paştdayîşê PDKyî ameyî qetilkerdene. PDK eşkera vera gerîlayan kişta dewleta tirke de kewto mîyanê şerî.

PDKyî vera eşkerayîya HPGyî bi vatişê çi gureyê gerîlayan Xelîfan de esto hêriş girewto xo ser, qebul kerdo. PDKyî 2020î ra nata dormeyê waranê gerîlayan geno. Heme xetanê rayîrî birneno ke gerîlayî yew warî ra meeşkê şirê warê bînî. Vatişê PDKyî yê çi gureyê gerîlayan Xelîfan de esto, esle xo de yew îtîraf o ke dormeyê gerîlayan yeno girewtene ke yewbînan ra bêrê raqilnayene. Pê vatişê çi gureyê gerîlayan Xelîfan de esto wazeno hêrişanê xo yê vera gerîlayan bikero meşrû. Eşkerayîya PDKyî ra yeno fehmkerdene ke do ewro ra tepîya zî semedê çînkerdişê Têgêrayîşê Azadîye yê Kurdan paştî bidê dewleta tirke. HPGyî eşkerayîya xo de ard ziwan ke ê seba ke pêrodayîş mevejîyo çîyo ke destê înan ra yeno kenê û vat seba ke înan waştişê PDKyî nêard ca verê pêrodayîşî girewt, narey ê pê ronayîşê daman hêriş kenê.

Gerîlayî bi mengan o vera hêrişê îşxalî yê dewleta tirke  semedê heme şarê kurdî xover danê. Dewleta tirke cayanê ke kewta tede nêeşkena tira vejîyo. Seba ke tîya tengayî ra vejîyo hêrişê Şingal, Mexmûr, waranê Pencevîn, Şehrazorî û Rojawanî kena. Nê hêrişan de bi desan kurdî ameyî qetilkerdene. Dewleta tirke pê gazanê axuyînan her hetê Kurdîstanî de hêrişê îşxalî kena. Demo winayên de  PDK dormeyê gerîlayan geno ke wa meeşkê  xo bileqnê.  Nê hêrişî eşkera semedê paştdayîşê dewleta tirke yenê kerdene. PDK beno hamparê konseptê tasfîyekerdişê Têgêrayîşê Azadîye yê Kurdîstanî.

Dewleta tirke paştdayîşê PDKyî ra cesaret gena zafêr hêrişê waranê Kurdîstanî kena. Xora hêrişê vera Avaşîn, Zap û Metîna bi yew koordînasyonî yenê kerdene. Tekîlîya PDKyî ya bi dewleta tirke zirar dana heme destkewteyanê Kurdîstanî. Polîtîkayê PDKyî yê kurdan rê danê vînîkerdene. Eke mabênê Têgêrayîşê Azadîye yê Kurdan û PDKyî de pêrodayîş vejîyo no zirar dano ameyoxê kurdan.  PDK zaf şino gerîlayan ser ke wa pêrodayîş vejîyo. Eke verê nê nêro girewtene kurdî do zaf pîl vînî bikerê. Xora dewleta tirke seba ke kurdî statu dest mefîno çîyo ke destê ci ra yeno kena.

Ganî şarê kurdî û rayapêroyîye vera nê hêrişan tewirê xo ramojnê. Eke verê polîtîkayanê PDKyî nêro girewene beno dima ra poşmanîya pîle bibo. Ganî hunermend û roşnvîrê kurdan ê biwîjdanî berpirsîyarîya xo ya tarîxî bîyarê ca. Wa pêro şarê kurdî û rayapêroyî bizano ke  PDK keno ke pêrodayîş bido destpêkerdene. Têgêrayîşê ma û hêzê ma yê gerîlayan sabir kenê berpirsîyarîya xo anê ca ke pêrodayîş mevejîyo la PDKyî semedê pêrodayîşî kerdo xo çeng, nêvindeno. Wa hinî raştîye eşkera bêrê vînayene. Ma pê bawer ê ke nê polîtîlayê ke estbîyayîş û ameyoxê kurdan fînenê tehluke, kurdî do verê înan bîgirê.''