Hemserekîya Konseya Rayberdişî ya KCKyî qirkerdişê Şukru Serhedî ser o eşkerayîye daye.

Eşkerayîye wina ya:

''welatperwerêko ke tedaya dewleta tirke ra semed Başûr de ciwîyayêne çend rojî verî Silêmanî de maruzê hêrişî bibi û bi giranî birîndar bi. Dima zî pêşmergeyêkê Dêrinî yo ke vera îşxalî vi hetê MÎTî ra ame pirodayene. Nê serebûtî mojnenê ke MÎTî Başûr de rêxistinîyêka hîra viraşta û naye ra pey zî do nê hêrişan rê dewam bikero.

Armancê nê hêrişanê vera welatperweran û Têgêrayîşê Azadîye yê Kurdan qirkerdişê kurdan o. Hêrişê vera embaz Şukruyî zî parçeyêkê na polîtîka yo. Teda û zulmê vera Vakurê Kurdîstanî, hêriş û qirkerdişê vera Rojawanî, hêrişê vera Mexmûr û Şingalî wayîrê heman armancî yê.

Dewleta tirke semedo ke estbîyayîşê xo qirkerdişê kurdan ser o ronayo nê hêrişan bi giranî kena. Îtîfaqo faşîst ê AKP-MHPyî zî verê qirkerdişê kurdan de Têgêrayîşê Azadîye sey asteng vîneno coka wazeno ey tasfîye bikero.

Dewleta qirker-kolonyalîste pê rotişê xo welatanê Ewropa û Amerîka zî kena paştgîrê polîtîkaya qirkerdişî. Ewropa û Amerîka paştî danê tasfîyekerdişê Têgêrayîşê Azadîye û qirkerdişê kurdan. Coka Amerîka û Ewropa hemkarê nê sûcan ê. Ge ge ê semedo ke hemkarîya xo binimnê vanê wa sivîlî nêkişîyê. Pê nê vateyanê xo polîtîkayanê qirkerdişê kurdan ê AKP-MHPyî teşwîq kenê.

Ma bi eşkere ney vanê ke kamyew dewlete û hêzo sîyasî hêrişanê Tirkîya normal û meşrû bivîno a beno hemkarê qirkerdişê kurdan.

Dewleta tirke pê paştdayîş û hemkarîya Amerîka û Ewropa vera Têgêrayîşê Azadîye yê Kurdan konseptê tasfîye ca ana. Tewirê vera qirkerdişê kurdan, têkoşînê vera ney, rijnayîşê îqtîdarê AKP-MHPyî xoverdayîşo tewr meşrû û heqdar o. No xoverdayîş sere de şaranê Rojhelatê Mîyanênî rê pêro merdimîye rê xizmetêko pîl o.

Dewleta tirke vana ke kamca de sîyasetmedarêkê wayîrê fiikrê azadî û kurd estbo a do înan bikişa. Bêvengîya vera hêrişan kurdanê azadan sey sûcdar mojnena. Wa her kes bizano ke Têgêrayîşê Azadîye û kurdî têkoşînêkê heqdarî kenê. Têkoşînê vera kolonyalîzmî heqê kurdan o. No têna hedefê PKKyî nê hedefê pêro kurdan û hêzanê demokrasî yo. Ê sûcdarî  îtîfaqê AKP-MHPyî yo ke kurdan qir keno.

Kamca de kurdî estbê PKK zî esto. Çew nêeşkeno vajo ke kesê ke fikranê Rayber Apoyî pawenê ganî tîya de bibê la uca de nêbê. Nê kurdî wayîrê fikrê sîyasetmedarî, fikirdar û zanaye vejîyenê. Kesê vera ney faşîst, dişmenê kurdî yê. Kamca de kurdî estbê fikrê Rayberîye uca de bibê. Îqtîdarê AKP-MHPyî semedo ke dişmenê kurdan o hêrişê Rojawan, Vakur, Başûr, Şingalî û kamca de kurdî estbê hêrişê uca keno.

Ewropa de, Paris de hêrişê vera Sakîne, Fîdane û Leyla netîceya nê ferasetî yo.

Dewleta tirke qet yew huqûq, qanûn û normanê mîyanneteweyîyan qebul nêkena û hêrişan kena, sivîlan qetil kena, nêweşxaneyan dana bombayan ver û daristanan vêşnena, gazê jehrînî û çekanê kîmyewîyan xebitnena. Ganî nê sûcî mehkemeya heqanê merdiman de bêrê muhakemekerdene.

Serekê Amerîka Bidenî wexto ke dest pê wezîfe kerd vat ke ê do giranîye bidê heqanê merdiman, demokrasî û huqûqî. La ê sûc û hêrişanê îqtîdarê AKP-MHPyî nêvînenê û kiştoxan reyde pêvînayîşan lenê. No yeno manaya meşrûkerdişê dîktator û kiştoxan. Eke ê do warê demokrasî û azadîye de sey vateyê xo bikerê ganî erjî qurbanê menfaatan nêbê.

Kurdî ganî vera hêrişan yewîya xo bîyarê ca, pê tewirê xo yê welatperwerî ganî têkoşîn bikerê. Bi taybetî ewro têkoşîn û tewirê vera dewleta tirke amayoxê azadî û demokratîkî yê kurdan eleqedar kenê. Coka ganî hêzê sîyasî yê çar parçeyanê Kurdîstanî ganî vera hêrişan wayîrê fikrê Rayberîye vejîyê. Bêvengî û bêtewirîya vera hêrişanê Tirkîya yenê a mana ke dewleta tirke pêro kurdan sey eşqîya, terorîst û barbarî vînenê.

Sere de şarê Silêmanî ganî şarê Başûrî û hêzê sîyasî sey şorişgêrêkî welatperwerî yê kurdî wayîrê embaz Şukruyî vejîyê û ganî no bibo tewirêkê mîsalî. Kamca de kurdî, kadroyê PKKyî yan zî sempatîzanê fikrê Rayber Apoyî bikişîyê ganî wayîrê înan bêro vejîyayene. Vera kolonyalîzm cewabêko tewr xurt no yo. Pê nêzdîbîyayîşanê winasênan ganî hêrişî bêrê vindarnayene. Ganî şarê kurdî pê ruhê yewîya neteweyî vera îqtîdarê faşîstî yê AKP-MHPyî tewirêkê winasênî bimojno ke ganî îstîxbaratê faşîzmê AKP-MHPyî, hêzê înan ê mîlîtarîstî Başûr de û cayê bînî de nêeşkê bimanê. Ganî qirker û hemkarê înanê ke dişmenîya kurdan kenê werte ra vînî bibê.

Şarê kurdî û domanê înan ê fedayî gerîlayî rixmê pêro zehmetîye bedelanê giranan danê û têkoşîn kenê, ê îqtîdarê AKP-MHPyî anê verê rijîyayîşî. Pêro kurdî û hêzê sîyasî yê çar parçeyanê Kurdîstanî û teberê welatî eke vera nê îqtîdarî tewirê xo eşkera bikerê no îqtîdar nêzdî de do birijîyo. Wexto ke îqtîdarê AKP-MHPyî birijîyo verê demokratîkbîyayîşê Tirkîya û çareserîya meseleya kurdan do bêro akerdene, no zî semedê caardişê destkewteyanê kurdan û demokratîzebîyayîşê Rojhelatê Mîyanênî gamêka pîle biba.

Nê esasî ser o ma venga pêro hêzanê sîyasîyan ê kurdan û hêzanê demokrasî danê ke vera îqtîdarê AKP-MHPyî têkoşîn geş bikerê, Kurdîstanî azad bikerê û Tirkîya û Rojhelatê Mîyanênî demeokratîk bikerê.''