Komîteya Weşîye ya KCKyî eşkerayîyêka nuştekî weşanaye û venga Rêxistina Weşîye ya Dinya, sendîka û xebatkaranê weşîye, komeleyanê heqanê merdiman, Înîsîyatîfê Haştîye, Komîsyonê Multecîyan ê Neteweyanê Yewbîyayeyan û hukmatê Iraqî da ke vera hêriş û sûcanê şerî yê dewleta tirke cade têbigêrê.

Eşkerayîye wina ya:

''Ma hêrişê dewleta tirke yê vera Nêweşxaneyê Sikênîyê yê Şingalî şermezar kenê ke sivîlî tede yenê dermankerdene. Netîceya bombardumanê 17ê tebaxe de yewê ci doman, wezîfedarê weşîye û nêweşî bi temamî 8 kesî ameyî qirkerdene, xeylêk kesî zî birîndar bîyî. Ma keyeyanê qurbananê qirkerdişî rê, komelê weşîye û şarê xo rê serweşîye wazenê û birîndaran rê şîfaya xeyrîne wazenê.

Goreyê huqûqê şerî yê mîyanneteweyî, bombakerdişê nêweşxane û dezgehanê weşîye, zerardayîşê nê dezgehan, kiştişê nêweşan û kedkaranê weşîye sûcê merdimîye yo. Pê hêrişê vera nêweşxaneyan, dewan û wesayîtanê sivîlan sûcê şerî yê. No sûc sûco verên ê Komara Tirkîya nîyo. Verî zî Vakur, Başûr, Rojawanê Kurdîstanî, Şingal û Mexmûr xeylêk reyî dîyayî bombayan ver, sivîlî ameyî qetilkerdene, xoza ameye wêrankerdene, seke Efrîn de qewimîyeno merdimî ameyî remnayene û pê îşkenceyî kişîyayî, keyeyî ameyî talankerdene. Serranê verênan de ca û wareyanê Qendîlî de pê bombardumanê vera nêweşxaneyî linga cinîyêka sivîle tira pabîye. Hêrişêkê bînî de 24ê tebaxa 2011î de wesayîto ke tede Solîna dergûşe û keyeyê ci estbîy ame hedefkerdene û keye bi temamî ame qetilkerdene. Her hêrişê hewayî de bi seyan heywanê şarê sivîlî kişîyayî, zerar resa keyeyanê şarî, dibistanêke ameye îmhakerdene. 2014 de netîceya bombardumanî de dewa Zergele de 10 sivîlî ameyî qetilkerdene. Eke sûcê îqtîdarê faşîstî AKPyî bêrê cigêrayene do bêro dîyene ke nê sûcî têna ê wextê nêzdîyî yê, vera kurdan polîtîkayêka çinkerdişî ya sîstematîke û qirkere yena kerdene. Semedo ke hesabê nê sûcanê bi serran ê Tirkîya nêame perskerdene 17ê tebaxa 2021î de Şingal û Rojawan de nê sûcî newe ra kerdî.

Nê sûcê dewleta tirke pê hûmaritişî nêqedîyenê labelê kiştişê sivîlan eşkeno bêro qedînayene, îqtîdarê AKPyî eşkeno bêro vindarnayene. Cuye, heq û azadîya merdiman her tewirê menfaatanê sîyasîyan ra berz ê. Coka ma venga dezgehanê mîyanneteweyîyan danê ke erkê xo bîyarê ca. Ma venga rayaumûmîye danê ke vera sûcanê şerî yê dewleta tirke bêveng nêmane. Heta ke na bêvengîye dewam bikera qirkerdişî zî do dewam bikerê. Bêvengîya dezgehan ê mîyanneteweyîyan nê qirkerdişanê Tirkîya rê rayîr akena. Bi taybetî bêvengîya Amerîka. Wezîfeyê pêro merdiman o ke peynîya na bêwijdanî û bêexlaqî bîyarê.

Bêvengî kişena, her bêvengî semedê qirkerdişêkê neweyî vengdayîş o. Sûcê şerî yê dewleta tirke binpaykerdişê Peymana Cenevre yo, coka ganî dezgehê mîyanneteweyî cade têbigêrê.

Semedê wayîrvejîyayîşê vîrameyîşê kedkaranê weşîye û doktoran, semedê hesabperskerdişê qirkerdişan ma venga doktor û kedkaranê weşîye danê ke pê şîarê 'Sûcanê şerî rê bes o' vera dewleta tirke û ê bînan semedê rijîyayîşê faşîzmî têkoşîn bikerê û seferber bibê.''