Colemêrgo ke serê sînorê Rojhelat û Başûrê Kurdîstanî de yo binê xizanîye, bêkarî de yo. Roniştoxê Colemêrgî neçarîye ra bazirganîya serê sînorî kenê. 15ê tebaxe de Rustem Çakmako 25 serre semedê bazirganîye dewa Şikeftan a qezaya Şemzînanî ya Colemêrgî ra vejîya la sînor de hetê leşkeranê Îranî ra kişîya.

Merdim û embazê Çakmakî Muhyettîn Mavîyî vat: ''Keyeyê ey qirkerdişê ci qebul nêkeno. Ma nêzanenê ke dewlete serê ney de vindena yan nê. Seke dîyeno peygoş kena. Heta nika eşkerayîyêke nêdîyaye keyeyê Rustemî. Leşkeranê Îranî nêzdîyê dewe de o qetil kerd. Şiwanan xîret kerd ke şorê cayê serebûtî la leşkeran nêverda. Rustem o çax birîndar bi û hewar kerdêne. Tira gonîye şîyêne. Dima ke Rustem merd leşkeran destûr da dewijan.''

Kişîyayîşê Rustem Çakmakî serebûto verên nêbi:

-Şemzînan de Vedat Ekîncî (14) 14ê tebaxa 2019î de sînorê Rûbarokî de kişîya.

-Dewa Awyanî ya Geverî de 29ê teşrîna verêne ya 2020î de Şeralî Derelî (61) kişîya.

-Taxa Yeşîlova ya Rûbarokî de 30ê teşrîna peyêne ya 2020î de Ozcan Erbaş (16) kişîya.

-Kuçeyê Bulvarî yê Colemêrgî de 2ê kanûna 2020î de polîsanê trafîkî Remzî Dûman û Metîn Oztûnç birîndar kerdî.

-Dewa Derîndere ya Rûbarokî de 30ê kanûna 2020î de leşkeran Reşît Ekîncî birîndar kerd.

-Gever de Nîhat Şerzan Akdogan (21) 1ê nîsana 2020î de pirodayîşê wesayîtê zirxînî ra birîndar bi.

-Mehmet Dînç (18) dewa Yeşîlova ya Rûbarokî de 22ê gulana 2020î de hetê leşkeran ra ame birîndarkerdene.

-Dewa Derîndere ya Rûbarokî de 18ê gulana 2021î de Şahap Şendol (23) û Celîl Ekîncî (17) hetê leşkeran ra ameyî birîndarkerdene.