Fermandaranê YJA-Starî ra Pelşîne Koçgirî hêrişê îşxalî yê dewleta tirke ya îşxalkere ANFyî rê ercnayî.

Qiseykerdişê Fermandare Pelşîne Koçgirî ra beşêk wina yo:

''Dewleta tirke 8 mengî verî  hêrişê Herêmanê Pawitişî yê Medya kerd. Înan vatêne qey uca de do mende bibe. Semedê ney înan vera gerîlayan gazê kîmyewî zî tede xeylêk metodê faşîstî ardî ca, erdê Başûrî talan kerd. Vakurê Kurdîstanî cara hertim teda û hêrişê înan dewam kenê. Dewlet û hêzê mîyanneteweyî pê bêvengîya xo nê hêrişanê Tirkîya tesdîq kenê. Eke no hêrişê vera nêweşxaneyê Şingalî cayê bînî yê dinya de biqewimîyo ê qîyametan nanê ro. PDK zî hemkarîya xo ya bi Tirkîya hînî nênimneno û mojneno ke menfaatê neteweyî semedê înan esas nîyê.

Tirkîya eke şerê vera Metîna, Zap û Avaşînî de ser bikewa pêro Başûrê Kurdîstanî do bivisna destî. Hedefê înan têna PKK nîyo destkewteyê kurdan o. Çîyo ke hukmatê Herêma Kurdîstanî fam nêkeno no yo. Dewleta tirke 4 mengan ra zêdêr o pê pêro teknîkê xo hêrişê nê cayan keno. Vînîbîyayeyê înan zaf ê. Ê nika wazenê îradeyê gerîlayan bişiknê û pêro erdî kontrol bikerê. Ê mewzîyanê ma ablûqa kenê û pê tayatayanê şerî, çekanê giranan, teqaberan û çekanê kîmyewîyan hêriş kenê.

La hema zî rixmê hende hêrişan ê nêeşkayî netîceyêke zî bivisnê destî. Avaşîn de Mamreşo, Zap de Cîloyê Biçûkî û Metîna de Girê Zendûra semedê dişmenî bîyê şikitişê xeyalan. Gerîlayî bi nê hawayî artêşa bihêzêre ya NATOyî xo ver danê. Girê Zendûra de rixmê gazanê kîmyewîyan ê dişmenî gerîlayan bi hawayêkê hempayî xo ver da û çêrîya xo îsbat kerde. 3 mengî yo mewzîyanê Werxelê û Girê Sorî de seferberîye esta. Hêzê YJA-Starî nê cayan de xeta Zîlane ser o îradeyê xo pêşkêş kenê.

Hesabê dewleta tirke o bi ke nê hamnanî Herêmanê Pawitişî yê Medya bivisna destî, dima zî Şingal û Rojawan hedef bikera la hesabê înan ser nêkewt. Îqtîdaro faşîst ê AKP-MHPyo ke pêro îmkananê xo semedê şerî xebitneno, netîceya nê serkewtişê gerîlayan de krîzê ekonomîkî reyde têrî mend. Semedê nê şerî multecî û cergî zî tede bazarîyan keno. Xora rîyê înan o raştikên hesabanê înan ê serê Afganîstanî de zî eşkera bîyo.

Şero ke Herêmanê Pawitişî yê Medya de qewimîyeno hedefo verên ê dişmenî yo, wayîrê girîngîyêka stratejîke yo ke qederê kurdan do eşkera bikero. Herêmê Pawitişî yê Medya yê ke tede gerîlatîya modernîteya demokratîke yena kerdene hedefê serekeyî yê dişmenî yê. No zî girîngîya waranê ma zêdîneno. Serfîrazîya nê şerî do biba temînatê estbîyayîşê gerîlayan, no zî do bibo temînatê cuya azade ya şarê ma, cinîyan û hişmendîya neteweya demokratîke.''