20ê êluel de dewleta tirke ya îşxalkere deweka Derawî ya taxa Xaşkanî ya Elbakî ya Wanî de, dewa Bilindbasanî ya Geverî û dewa Kuranî ya Ûrmîye ya Rojhelatê Kurdîstanî de kolberan ser o bombayî varnabî.

Hêriş de Elîşan Ehmed (16) û Sezodar Ehmedî (19) ameybî qetilkerdene. Cenazayê 2 kolberan bi saetan binê tîje ameyî verdayene û dima ameyî berdene bi Dezgehê Tipê Edlîyî yê Colemêrgî.

Kolberê bi nameyê Mîkaîl Hatemî, Ferzad Hatemî, Diyar Hatemî, Ahîn Hatemî, Guldanî Hatemî, Zêro Hatemî, Kinyas Hatemî, Axacan Hatemî û Behzat Hatemî zî serê sinorî de ameybî destbendkerdene û ameybî berdene bi Fermandarîya Cendirmeyan a Elbakî.

Kolberê bi nameyê Ş.Î. wina qala hêrişî kerde: ''Helîkopteran ma ser o guleyî varnayî. Kolberêkî ame vat helîkopterî hê guleyan varnenê. Dima ma o nêdî. Ma musayî ke cenayê ma cayê serebûtî ra ameyî berdene. Cenazayê ma bi seatan binê tîje de mendî.''

Roniştoxanê dewa Kuranî ra Sadeş Pilifkenî zî ard ziwan ke dima ke kolberî ameyî qetilkerdene xeta sînorî bi seatan dîyaye bombayan ver.