Komîteya Zindanan a PKK û PAJKî bi eşkerayîyêke venga tepişteyan da. Eşkerayîye wina ya:

''Embazanê ma yê cinîyan û camêrdan ê zîndanan rê;

Hemleya 'Tecrîd, îşxal û faşîzmî rê bes o, Wext Wextê Azadîye yo' serrêke xo pey de verdaye kewte serra diyîne. Konseya Rayberdişî ya KCKyî serrgêra 40. ya faşîzmê 12ê Êlule de na hemle dabî destpêkerdene. Armancê na hemle şiknayîşê tecrîdê vera Rayber Apoyî, rijnayîşê faşîzmî û qedînayîşê îşxalî bi. Grevê vêşanîye yo bêdem û bêagerayîşî yê 2018î  û gulana 2019î û rojeyê mergî ra dima Rayber Apoyî 2011 ra dima reya verêne pêvînayîş kerdbi. Xoverdayîşê embazanê ma yê cinî û camêrdan, reyna şehadetê 8 embazan asta pîle de tecrîd lerzna, rayaumûmîya demokratîke ya Tirkîya wayîra xoverdayîşan vejîayye, AKP-MHPyî fam kerd ke ê nêeşkenê tecrîdî bipawê. Dima reyna pêvînayîşê avûkat û keyeyan ame astengkerdene, tecrîdî dewam kerd û azadîya Rayberîye kewte rojdem. Hînî têkoşînê azadîya Rayber Apoyî yeno dayene.

Hemleya 'Wext Wextê Azadî ye yo' serra 40. ya faşîzmê 12ê Êlule de armanc kerd ke AKP-MHP çin bikero, şarê kurdî û Rayber Apoyî azad bikero. Tarîxê têkoşînê azadîya kurdan de zîndanan tim tewr vernîya têkoşînî de ca girewt. Ruhê 14ê Temmuze û xeta têkoşînî sey xeta têkoşînî ya zîndanan faydeyê pîlî dayî têkoşînê azadîye. Hemleya ke 12ê êlula 2020î de dîyabî destpêkerdene esasê xo sey têkoşînê şarî yê çar parçeyanê Kurdîstanî dayo destpêkerdene. Xora gerîlayî bêmabên têkoşîn de yê, merkezê hemleya têkoşînê azadîye de ca gênê. Hemleya 'Wext Wextê Azadîye yo' pê wayîrbîyayîşê kurdan û dostanê înan 4 parçeyanê Kurdîstanî û Ewropa de, her cayo ke tede kurdî estê de têkoşîn vist vernî.

Hemleya 'Wext Wextê Azadîye yo' esasê xo hemleyêke bîye ke semedê averşîyayîşê komel û gerîlayan bîye. Têkoşînê azadîye yê zîndanan sey her wextî xo rê wezîfe kerd û dest pê grevê vêşanîye yê bidorî kerd. Sey her wextî înan hêz dayo na hemle zî, rojdemkerdişê na hemle de rolêko tarîxî kay kerd. Rixmê tedayanê zêdeyan zî grevê vêşanîye dewam kerd. Embazanê zîndanan babetanê tesîrkerdişê hemle de, rijnayîşê îqtîdarê AKP-MHPyî de, beşdarîya bi hemle de wezîfeyê xo kerdî. Bêşik û bêguman armanco esas ê na hemle şiknayîşê tecrîdê vera Rayber Apoyî yo ke no armanc dewam keno. Na mana de Hemleya 'Wext Wextê Azadîye yo' kewte safhayêka newîye. Na hemle do 2021 de zî dewam bikera û semedo ke armancanê xo bîyara ca zî serebûtanê girîngan bîyara ca.

Zîndanan de vera dişmenî bi 24 saetan têkoşîn yeno kerdene. Pêro embazê ma yê cinî û camêrdî pê ruhê 14ê Temmuze vera her zorî û teda têkoşîn kenê. Na raştîye werte de ya ke naye ra pey pêro embazê ma û demokratîkî têkoşîn bikerê. Şima Hemleya 'Wext Wextê Azadîye' de mesuldarîyê xo keyeyanê xo reyde bi layîqî ardî ca. Serra 2021î şarê kurdî her ca de Hemleya 'Wext Wextê Azadîye yo' do zêdêr xurt bikero. Xora gerîlayî her prosesanê tarîxîyan de mesuldarîya xo bi fedakarî anê ca.

Wexto ke ma na raştîyan gênê verê çimanê xo; embazê ma yê zîndanan tim vera kolonyalîzm-qirkerdişî mîyanê têkoşînî de yê ke çarçewa na hemle de zî pê çalakîya înan a grevî ma bi qîmî paştdayîşê înan vînenê. Çunke embazanê ma yê zîndanan caardişê hemle û bihêzkerdişê ney de rolêko pîl û zêde kay kerd. Ma pê bawer ê ke embazê ma yê zîndanan goş bidê nê vengdayîşê ma û çalakîya grevê vêşanîye serrgêra 1. ya Hemleya 'Wext Wextê Azadîye yo' de biqedê. Bêguman embazê ma yê ke mîyanê xoverdayîşî de yê, bê çalakîyanê sey grevê vêşanîye zî do pê renganê cîyayan û xurtan tewrê hemle bibê. Xora cara xoverdayîşê înan tim hêz dano têkoşînê şerwananê azadîye, pêro şarê ma, ciwanan, cinîyan û dostan.

Ma pêro embazanê cinîyan û camêrdan semedê fedakarîya înan a qey 'Hemleya Wext Wextê Azadîye yo' fîraz û selam kenê; sey her çaxî ma têkoşînanê bînan de zî şima rê serkewtiş wazenê.''