Fermandaranê YJA-Starî ra Leyla Amed cewab da persanê ANFyî. Qiseykerdişê Leyla Amed ra beşêk wina yo:

''Embaz Adil Bilikayî vatêne 'bedenê welatêkî ser o qet sînorî nênê eştene.' Dewleta tirke ronayîşê komare ra nata wazena Kurdîstanî hîna zêde parçe bikera coka sînoranê neweyan virazena. Verê ney de gerîlayî asteng ê. Dewleta tirke coka gerîlayan kena hedef. Gerîlayî sînoran qebul nêkenê. Dewlete pê viraştişê qereqolan û tepeyan nêeşkena verê yewîye bigêrê. Seke embaz Adilî vatbi 'Şima serê nê sînoran de destê yewbînan zî bigêrê û bivinderê zî ma do mîyanê linganê şima ra derbaz bibê û şorê, kamca de wazenê uca de şer bikerê.' Serranê 90an de artêşa tirke her serre operasyonê hîrayî kerdêne û vatêne 'gerîlayî hê qedîyenê.' Rixmê hende têgêrayîşanê înan zî ê hê qedîyenê.

Ê vanê qey eke têkilîya gerîlayan bibirnê, tay cayan bigêrê, qereqolan virazê eşkenê gerîlayan biqedînê. La gerîlayî hertim têgêrayîşê xo rê dewam kenê. Dewleta tirke naye zanena la rayaumûmîye xapînena, zûran kena. Pêro operasyonê înan bênetîce qedîyayî. Teknîk û taktîkê înan vera gerîlayan pûç bîyî.

Verî leşkerî ameyêne warê operasyonî nika ê qereqol û kalekolan de heps mendî. Artêşa tirke ya îşxalkere zêdêr hewayî ra hêrişan kena. La gerîlayan xo goreyê şerê wextê neweyî dîzayn kerd û ê gerîlatîya moderne kenê. Semedo ke tay kêmasîyê ma estê vînîbîyayîşê ma estê. Mîsal Cûdî de embazê ma nêverdenê ke ê pê keyfê xo têbigêrê. 40 serrî yo ê vanê 'Ma Cûdî de gerîlayî qedînayî.' Hînî her kes zaneno kam ho qedîyeno, bin şino. Dişmen nêeşkeno serê erazî de vera gerîlayan operasyonêkê hîrayî bikero. Ê têna tay wareyan de operasyonê erazî kenê. Nê operasyonan de zî teyarayan şuxilnenê. Qaşo înan hende qereqolî viraştî la reyna zî pê tersî têgêrenê. Wa bitersê zî çunke dişmen zaneno ke Kurdîstan bêwayîr nîyo. 40 serrî yo şêr, baz, kêna û lajê ci ey pawenê.

2015 ra nata artêşa tirke vera gerîlayan teknîkê pîlî şuxilnena. Ê pê hêzê xo zaf bawer bîyî. La gerîlayan teknîkê înan pê taktîkanê xo çin kerdî. Nika artêşa tirke pê yewinanê nimiteyan, kontrayan û qoricîyan kena ke vera gerîlayan têbigêra. Gerîlayî têna vera artêşa tirke çalakîyan kenê la kamo ke îxanet keno, dişmenî reyde têgêreno zî ceza kenê. Ê kesê ke xo roşenê û azadîya Kurdîstanî asteng kenê do hetê hêzanê ma ra bêrê cezakerdene.

Rayberê ma nika binê tecrîdêkê giranî de yo. Şarê ma hînî safhaya zîndan û mergî ra derbaz bîyo. Eke şarê ma vera zulm û îşxalî vengê xo vejo hînî zîndan, îşkence û mergî nêmanenê. Senî ke gerîlayî wezîfeyê xo kenê wa şarê ma zî bikero, wa şarê ma meverdo dişmen erdê Kurdîstanî de hîna bi rehet têbigêro. Ma qels nîyê. Tecrubeyê ma yo 40 serre esto, ma xurt û çêr ê. Ma eşkenê na safhaya dişmenî zî qels bikerê. Eke ma wezîfeyanê xo bîyarê ca serfîrazî qetî bêra destvistene.''