Hemserekê MED-DERî Rifat Ronîyî bi wesîleya termînê neweyî yê perwerdeyî eşkerayîyêke daye û venga dewleta tirke da ke asîmîlasyon û înkarî war verda û perwerdeyê bi ziwanê dayîke bîyara ca.
Komeleya Cigêrayîşî ya Kultur û Ziwanî ya Mezopotamya (MED-DER) bi wesîleya termînê neweyî yê perwerdeyî bînaya xo ya qezaya Peyasî ya Amedî de eşkerayîyêke daye. Xeylêk termsîlarê dezgeh û rêxistinan zî tewrê eşkerayîye bîyî.
Masaya eşkerayîye de pankarta 'Perwerdeyo bi ziwanê maye heqo eslî yo, binpaykerdişê nê heqî sûcê vera merdimîye yo' ameye dardekerdene.
Hemserekê MED-DERî Rifat Ronîyî eşkerayîye de ard ziwan ke bi mîlyonan wendekarê kurdî û ê bînî çin hesibîyenê û nînan rê perwerdeyê bi tirkî yeno ferzkerdene. Ronîyî vat: ''Êyê ke wazenê kurdkî bipawê yenê astengkerdene. Zîndanan de nuştişê bi kurdkî qedexe yo, kitabê kurdkî nêdîyenê, qiseykerkedişê bi kurdkî beno sebebê ceza û tehqîqatan.
Ganî waştişê perwerdeyê bi ziwanê dayîke yê kurdan û ê şaranê bînan bêro caardene. Wa dewlete domananê kurdan ra uzrê xo biwaza ke 98 serrî yo heqê înan binpay kena. Ma perwerdeyê bi ziwanê dayîke wazenê.''
