Merkezê Îrtîbatî û Çapemenîye yê HPGyî derheqê çalakîyanê gerîlayan û hêrişê artêşa tirke de eşkerayîyêke daye û nê parî kerdî:

''Çarçewa Hemleya Şorişgêre ya Cengê Xabûrî de herêma Metîna de;

27ê tebaxe de Girê Şehîd Çîya de îşxalkerî hetê hêzanê ma ra ameyî pirodayene. Çalakîye de tewr tay îşxalkerêk ame cezakerdene.

Waranê Xoverdayîşî yê Girê Sorî û Werxelê yê Herêma Avaşînî de;

26 û 27 tebaxe de îşxalkeranê ke Girê Sor pê çekanê giranan bombarduman kerd waşt ke aver şirê. Badê mudaxaleyê xoverdayoxanê Girê Sorî îşxalkerî mecbûr mendî ke peyser agêrê. 27ê tebaxe Warê Xoverdayîşî yê Werxelê pê gazanê axuyînan û madeyanê teqayîşî ame bombardumankerdene. Waranê Xoverdayîşî ser gêrayîşê teyarayanê keşîfî û droneyan dewam keno.

Mabênê 24 û 27ê tebaxe de warê Şikefta Birîndara yê herêma Zapî hetê qereqolanê sînorî ra pê çekanê giranan û 27ê tebaxe de zî pê teyarayanê şerî ame bombardumankerdene.  Netîceya bombardumanan de erazî de şewato ke vejîya dewam keno.

27ê tebaxe de warê Girê Sor, Girê Sipî, Girê Silêmanî, Mevanos, Tabûrê Ereban ê herêma Avaşînî de têgêrayîşê helîkopteran qewimîya û warê Stûnê, Girê Şehîd Rizgar, Girê Şehîd Elî û Werxelê pê helîkoperanê hêrişî ameyî bombardumankerdene.

Eynî roje xeta Qaşûra ya Metîna de têgêrayîşê helîkopteran qewimîya û dormeyê dewanê Dêşîşê, Derarê, Kêste, û Seraru yê Kanî Masî ya Amedîye û warê Girê Koordîne, Girê Azadî, Kela Qûmrîyê pê helîkopteranê hêrişî ameyî bombardumankerdene. Reyna dewa Şîyê ya bajarekê Dînartê yê qezaya Akrê zî pê teyarayanê şerî ameye bombardumankerdene.''