Têgêrayîşê PDKyî Metîna de 2020 de kewt prosesêkê neweyî. PDKyî herêmanê Metîna û Heftanînî de dest pê têgêrayîşê xo yê leşkerî kerd. Nê tarîxî ra heta ewroyî PDK semedo ke herêmanê gerîlayan bivisnê destî têgêreno.
PDKyî reyan verêne pê hêzanê Iraqî hêrişê Metîna kerd. Nê hêrişî ra pey Metîna de serrêke de bi desan baregehî û noqtayê leşkerî ronîyayî. Dewleta tirke ya ke Garê de bin kewte zanayîşê îstîxbaratî û koordînatê kampanê gerîlayan girewtî û bi bê hawayî hêzê PDKyî sînordar kerd. La dewleta tirke pê gerîlayan nêeşkaye û PDK kerd hemkarê opersyonanê xo yê îşxalî. Naye ra pey PDKyî semedo ke Qendîl, Metîna, Şêladizê, Xelîfan û Herêmanê PAwitişî yê Medya bigêro binê ablûqa dest pê amadekarîye kerd û gerîlayan rê dafike naye ro. Serebûto peyêno ke Xelîfan de qewimîya na rewşe eşkera keno.
5ê hezîrane de hêzanê PDKyî Metîna de şer îlan kerd. Înan hêzê xo sewqê tîya kerdî û dima zî vera Girê Çarçel û Girê Hekarî yê Metîna di baskan ra dest pê hêrişan kerd. Hêzanê gerîlayan bire daye ke Metîna ra xo apey biancê. Xoverdayîşê destanî yê xoapeyantişî de 6 gerîlayî şehîd bîyî. Gerîlayê Girê Çarçel û Hekarî semedo ke vera PDKyî şer nêkerê û provakasyonê neweyî nêqewimîyê bi întîzamî têgêrayî.
Metîna de têgêrayîşê PDKyî hetê di hêzan ra qewimîyeno. Vakurê Metîna de yanî Kanî Masî ra heta Batûfa PDK tugayê diyîn, hîrêyîn û çarinî reyde têgêreno. Başûrê Metîna de PDK hêzanê Zerevanî reyde têgêreno ke tede cergê Roje zî estê. Her çiqas ê nameyê pêşmergeyî şuxilnenê zî pêşmergeyî vera gerîlayan şer nêkenê. Nê hêzî hêzê kîrakerde yê PDK û Barzanîyî yê.
Hêzê Zêrevanî pabesteyê keyeyê Barzanîyî yê û wezîfeyê nê hêzî yo ke dekewtiş û vejîyayîşê artêşa tirke ya îşxalkere bi hawayêkê asayî bîyarê ca. Mîyanê hêzanê Zêrevanî de rêxistinîyêka xurte ya dewleta tirke esta. Dewleta tirke wezîfe dana nê hêzan. Tay hêzanê Zêrevanî semedo ke vera gerîlayan şer bikerê perwerdeyî ra derbaz bîyî.
2ê êlule de şewe hêzanê PDKyî hêzê neweyî erşawitî Metîna û baregehê neweyî ronayî. Yeno vatene ke baregehê neweyî do ronîyê. PDK bi nê hawayî wazeno pêro rayîran biqefilno û paştdayîşê lojîstîkî yê bi gerîlayan asteng bikero. PDK wazeno pê mobeseyan û teknîkê çimdarîye pêro warî kontrol bikero û hêzanê gerîlayan teqîb bikero. Bi kilmî dewleta tirke çîyo ke nêeşkena bikera pê hetkarîya PDKyî kena. No zî xeta îxanetî eşkera keno.
