Zagros Botanî bi tesîrê qiseykerdişê fermandar Reşîd Serdarî bira xo daye û leşkerîya tirkan ra rema û koyanê Kurdîstanî de bi gerîla.

Gerîlayê HPGyî Zagros Botanî qala hîkayeyê xo yê remayîşê leşkerîye kerde.Fermandaranê gerîlayan ra şehîd Reşîd Serhad çend serran verê cû ropotajêk dabi û wina venda ciwananê kurdan kerdbi: ''Ganî ciwanê kurdî agêrê xo. Şima do heta key xizmetê dewlete bikerê ke şima kişena, mekapê înan kenê xo pay. Ê solan xo lingî ra vejê. Ma kurd ê û leşkerîya xo bikerê." Dermandar Reşîd Serdar bi nê hawayî qisey kerdêne û qiseykerdişê ci televîzyon de ame weşanayene. Zagroso ke şaristanê Sakarya yê Tirkîya de neçare ra leşkerîye kerdêne bi nê qiseykerdişî bire daye ke abigêro xo.

Zagros keyeyêkê welatperwerî yê Botanî de bi pîl. Zagrosî vat ke merdim welaperwer zî nêbo leşkerîye de heqaret û nêzdîbîyayîşî ra agêreno rastîya xo ser. Zagrosî vat: "Ez bi embazê xo Rûbar şîya Şirnex û bi rayîrê embazan tewrê gerîlayan bîya. Rûbar mêrdinîj bi. Ma pîya herêma Besta de bîyî. Rûbar serra 2014î de Kobanê de şehîd bi. 

Wexto ke ma xo resna gerîlayan bi kêfweşî ameyî ma verî. Mat mendî. Embazan o wext amadekarîye kerdêne ke Girê Bayrakî de çalakîye bikerê. Mi zî waşt ke ez tewrê çalakîye biba. Muneqeşayan ra dima embazan qebul kerd. Girê Bayrakî de 30 leşkerê tirkî ameyî kiştene û gerîlayêk zî şehîd nêbi. Çalakîya min a verêne bîye. Wexto ke ez agêraya rastîya xo ser ez pê hesîyaya ke verê cû ez hetê kiştoxanê şarê xo de bîya la nika hetê xizmetkaranê şarê xo de ya. Têna ciwanê kurdî ney ganî her ciwano ke dişmenê şarî nîyo abigêro raştîya xo ser."