Şubeyê Amedî yê Komeleya Huqûqnasanê Seba Azadîye (OHD) derheqê tecrîdê Rayberê Şarê Kurdî Abdullah Ocalanî de binaya xo de kombîyayîşê çapemenîye kerd. Wekîlê HDPyî yê Amedî Remzîye Tosun û Musa Farisogullari, îdarekarê HDPyî, Komeleya 78an a Amedî, MED TUHAD-FED, TUAY-DER, Kongreya Îslamî ya Demokratîke (KÎD), OHD, wasîyê Rayberê Şarê Kurdî Abdullah Ocalanî Mazlum Dînç û endamê Meclîsê Ciwanan ê HDPyî tewrê kombîyayîşî bîyî.

Îdarekarê Merkezê Pêroyî yê OHDyî Berdan Acunî eşkerayîye wende. Acunî bala ante binpaykerdişê heqanê merdiman ser û vat: ''Tecrîd binpaykerdişê heqanê merdiman o. Cayo ke tecrîd tede tewr zaf yeno kerdene Îmrali yo. Îmrali sîstemê caardişê ceza yo. Tepiştişê Birêz Ocalanî armanc keno ke cîya bikero, yewtîp bikero, îtaat bido kerdene. Coka sîstemê tecrîdî cezakerdiş nîyo, teknîkê îdareyî yo. Tecrîd têna tepişteyan rê ney sere de keyeyan komelî rê zî dayîyeno kerdene.

Ferroz Abbasîyo ke Guantanamo de ame tepiştene mehkema bire daye ke 'qulikêkê sîya yê huqûqî de yo daye û eşkera kerd ke Abbasî bi hawayêkê keyfî ameyo tepiştene. Esas Guantanamo û Îmrali rewşa hemane ya qulikê sîyayî yê huqûqî yê. Nê qulikî ge ge benê zîndan, ge ge benê baregehê komkerdişî, herêmêke, şaristanêk û ge ge zî benê welatêk.''

Bi serran o ke Birêz Ocalan nêeşkeno heqanê xo bixebitnê. Mecburîyeto ke o nê heqanê xo bixebitno. Huqûq goreyê îqtîdarî, partîye û kesan nêno awankerdene. Coka her kes mecbur o ke goreyê huqûqî têbigêro. Seba ke nê kerdişê bêhuqûqî bêrê vindertene ma venga rayaumûmîye danê ke wa hîsger biba."