Komîteya Têkilîyanê Teberî ya PKKyî bi serrnameyê 'Rayaumûmîye rê Eşkerayîya Lezabeze' eşkerayîyêke daye. Eşkerayîye wina ya:

''Rêxistina kontra ya dewleta tirke ya faşîste MÎT û kontrayê ci yê hemkarî di rojî yo Silêmanî de embazanê ma yê welatperweran ê Vakurê Kurdîstanî hêrişan kenê. Dewleta tirke ya qirkere û hemkaranê ci ewro (17ê êlula 2021î) serê sibayî embazê ma Yasîn Buluto ke semedê tedawî şibi Silêmanî verê keyeyo ke tede mendêne de bi hawayêkê wehşîyî qetil kerd. Embazê ma Yasîn Bulıt serê sibayî semedo ke şoro nêweşxane keye ra vejîya û a hele pey ra kontraya tirkan o şehîd kerd. No qirkerdişo barbar têna vera ma nê vera îstîkrarê pêro şarê Başûrê Kurdîstanî û Silêmanî ame kerdene.

Nê qirkerdişî ra rojêke verî zî welatperwero vakurij Ferhat Bariş Kondu kargehê xo de hetê heman hêzan ra ame pirodayene. Nê wird serebûtî zî mojnenê ke Erdoganê faşîstî û rêxistina ci MÎTî qirkerdişê û cînayetê sîyasî yê plankerde û amadeyî dayî destpêkerdene. Eke MÎT wina rehet tîya de têgêreno û eşkeno terorê dewlete bikero ganî sere de hukmatê Başûrî  mesuldarê herêma Silêmanî eşkerayîyan bidê û pêro tedbîran bigêrê. Nê hêrişî vera îstîkarar û asayîşê Silêmanî û şarê Silêmanî yê. Eke dewleta tirke curet kena ke pêro parçeyanê kurdîstanî de qirkerdişan bikera ganî ma sey pêro kurdan bi hawayêkê lezabezî vera ney tedbîran bigêrê û tewirêkê hemparî bigêrê. Eke tewiro elzem nêro girewtene, faîlî nêrê tepiştene û teşhîrkerdene qirkerê winasênî do cezaret bigêrê.

Ma sey Têgêrayîşê Azadîye pê wayîrvejîyayîşê têkoşîn û vîrameyîşê embazê ma Buluto ke keda 40 serre daye têkoşînê şarê kurdî cewab bidê nê hêrişan. Embazê ma Bulıto 64 serre bi serran semedê şehîdanê têkoşînê azadîya Kurdîstanî yê ke pê gan û gonîya xo têkoşîn kerd û şehîd bîyî, xebitîyayêne. Rixmê kokimî û nêweşîya xo zî Embaz Yasîn Bulutî (Şukru Serhat) kedêka pîle û bêhempa daye û dima ke nêweşîya ci bîye giranêr semedê tedawî şi Silêmanî. La dewleta tirke ya faşîste semedo ke fermanê mergî yê kurdan dayo werteyê kuçeyan de hêrişê merdimanê nêweşan kena û înan qetil kena. Şarê ma ganî goreyê vîrameyîşê têkoşînê embazê ma wayîrê ci vejîyo. Sere de şarê ma yê welatperwerî yê Başûrê Kurdîstanî ma venga pê kesayetan û partîyanê sîyasîyan danê ke vera nê qirkerdişî tewirê xo bimojnê, wayîrê embaz Yasîn Bulutî vejîyê û tewirê xo dîyar bikerê. Ma sey têgêrayîşê azadîye peyê nê kerdişî meverdê û sey tewirêk wayîrê vîrameyîşê embazê xo vejîyê.''