Endamê Konseya Rayberdişî ya KCKyî Sabrî Okî Stêrk TVyî rê rojdem ercna. 

Qiseykerdişê Okî ra beşêk wina yo:

''Tecrîdê vera Rayberê ma 23 serrî yo dewam keno. Dewleta tirke xîret kena ke têkilîya Rayberê ma ya bi şarî bibirna û têgêrayîşê ma zî bêperspektîf verda. Na rewşêka normal nê îstîsnayî ya. Ganî şarê ma û têgêrayîşê ma vera nê tecrîdî bi hawayêkê xurtî têbigêrê û sey 90an Kurdîstan de cuye vindarnê. 

Îqtîdarê AKP-MHPyî semedo ke îqtîdarê ci dewam bikero her roje hêrişê Başûr, Şingal û Rojawanî keno. Dewleta  tirke 1925 de Planê Şark-Islahatî ra nata kurdan rê qirkerdiş ferz kena. Îqtîdar ho rijîyeno, hînî peynîya faşîzmê AKP-MHPyî ameya. Her kes ney zaneno.

Ez embaz Seîd Hesen û kesanê ke Şingal de hêrişê dewleta tirke yê vera nêweşxaneyî de dinyaya xo bedilnayî bi rêzdarî yad kena. Şehadetê Seîd Hesenî wextê zîyaretî yê Kazimîyî de qewimîya. Ganî hukmatê Iraqî nê hêriş û qirkerdişî şermezar  bikerdêne. Selahîyetdaranê PDKyî zî vat ke nêweşxane merkezê PKKyî bi. Yew; no zûr o! Di; şima çira eşkerayîya winasêne danê? Hîrê; dewleta tirke wayîra erdê Iraqî nîya, senî wina bombarduman kena. Çar; êzidîyan bedelê giranî dayî, qirkerdiş dî. Yewîya Ewropa qirkerdişê êzidîyan şinasnena la vera hêrişanê dewleta tirke bêveng a. Şarê êzidîyî vera cerganê DAÎŞî xo ver da, vera hêrişanê Tirkîya zî xo ver dano. Ê do qetî apey gamêke nêerzê.

PDK her şaşîtîye ra PKK sey mesuldar vîneno. PDK ganî ziwanê xo yê sûcdarkerdişê PKKyî ra fek vera bido ke hêrişanê Tirkîya yê vera Şingal û Başûrî ra PKK mesuldar vîneno. Herinda ney de ganî PDK semedê yewîya kurdan rol û erkê xo bîyaro ca. Wa PDK waştişanê şarê kurdî rê asteng nêbo. Cinî, ciwan, nuştox û roşnvîranê kurdan vera îşxalî nêrazîbîyayîşêko pîl da. PDK ganî nînan teşwîq bikero. 

Afganîstan de Amerîka û Rûsya goreyê menfaatanê xo têgêrayî. Nika faturaya ney cinîyê afganî danê. Mumkîn nîyo ke Talîban goreyê krîteranê demokrasî têbigêro. Seke Rayberîye vatbi çareserî têna pê komelê demokratîkî bena. Eke wina nêbo Afganîstan de mesele dewam kena.''