Endamê Konseya Hemserekîye ya PYDyî Salîh Muslîm tecrîdê Îmraliyî, hêrişê Tirkîya yê vera Başûrê Kurdîstanî, sewqîyatê hêzanê PDKyî, hêrişê vera Rojawanî, pêvînayîşê serê yewîya neteweyî ANFyî rê ercnayî.

Qiseykerdişê Salîh Muslîmî ra beşêko verên wina yo:

''Şarê kurdî kamca de beno wa bibo eke Rayberîye azad nêba çîyêkî nêeşkeno bivisno destî. Dişmen zî ney zaneno coka destpêkî ra nata Îmrali de îşkence, tecrîd, teda estê. Semedo ke şarê kurdî rê teda bikero dişmen Rayberîye tecrîd keno. Tek muxatabê çareserîya meseleya kurdan esto, o zî Rayber Abdullah Ocalan o. Kam ke çareserîya na mesele wazeno ganî Îmraliyî reyde pêbikero. Şarê kurdî goş nano Îmrali ser. Tecrîdê Îmraliyî bêhuqûqî ya.

Şero ke Başûrê Kurdîstanî de qewimîyeno têna şerê gerîlayan nê şerê pêro kurdan o. Beşêkê PDKyî seke plananê Tirkîya ano ca. Êyê erşawîyenê waranê gerîlayan pêşmerge nîyê, sey Gulane, Zerevanî hêzê tay serdestan ê. Kayêko tehlukeyîn yeno kaykerdene. Ewro xêrê xoverdayîşê kurdan ra Başûr de erjî estê.  Eke bi aqilane tênêgêrîya tewr zaf PDK zerar vîneno. PDK vano ez şer nêkena la pê hêzanê xo ablûqa viraşta, gerîlayan asteng keno. No do zerar bido şarê kurdî.

Sey PYDyî semedê astengkerdişê ney destê ma ra çita yeno ma do bikerê, eke hewce bibo ma do mabênçîtîye bikerê. No şerê zereyî eke biqewimîyo pêro parçeyanê Kurdîstanî rê tesîr bikero.

Ez vana qey Macron semedê meseleya kurdan şîyo Iraq û Başûrê Kurdîstanî. Ma prosesêkê hesasî ra derbaz benê. Ewro pêro hêzê serdestî zanenê ke bê kurdan Rojhelatê Mîyanênî de qet yew mesele çareser nêbena. Coka ganî ma sey kurdan binê yew, wa vateyê ma têgêrayîşê ma yew bibo. Ma dost û dişmenê xo bişinasê ke duzenê neweyî de rolêkê pozîtîfî kay bikerê.''