Dîya zanayene ke 72 aktîsîtê heqanê merdim ê ke 6ê êlule de Behdînan de dest pê rojeyê mergî kerd, rewşa weşîya înan krîtîk a.

Temsîlkarê Keyeyanê Tepişteyan ê Behdînanî Eyhan Seîdî ard ziwan ke rewşa tepiteyan  krîtîk a û tay tepişteyî heta 40 kîloyî ameyî war.

Seîdî derheqê 72 aktîvîstan de nê vatî: ''Rewşa weşîye ya tepişteyanê ke 6ê êlule ra nata rojeyê mergî de yê zaf xirab a. Ma veng danê Neteweyanê Yewbîyayeyan, Parlamentoyê Herême yê Kurdîstanê Federe, Wezîrîya Edaletî û temsîlkaranê heqanê merdiman ê Hewlêr û Baxdadî. Wa tepişteyan zîyaret bikerê û bidê eşnawitene ke ê bîlasebeb ameyî tepiştene. Ma veng dane ke wa şiro dezgehanê eleqedaran ser ke qanûnî berê caardene.''

Waştişê tepişteyan wina yê:

Wa keye û avûkatan reyde pêvînayîşî bêrê kerdene.

Wa tepişteyî Zîndanê Asayîşî ra sewqê Zîndanê Gewranî bibê.

Wa dosyayê înan hetê Mehkemeya Pêroyî ra bêro çareserkerdene.

Wa heme tepişteyî goreyê qanûnê (5) rojnamegerîya kurdî û (11) protestoyî bêrê muhakemekerdene.

Tepişteyê ke mîyanê înan de huqûqnas, rojnameger, roşnvîr, nuştox û aktîvîstê heqanê merdiman estê hezîrana 2020î ra nata Behdînan de yenê tepiştene.