Destpêkê Hemleya Bazanê Zagrosî ra nata bi desan gerîlayan herêmanê Avaşîn û Zapî de bi desan rojnuşteyî amade kerdî. Zafê rojnuşteyî heyf ke hêrişanê barbaran ê artêşa tirke de vêşenê. Tay rojnuşteyî şehadetê gerîlayan ra dima nêmcet manenê. Nînan ra yew zî rojnuşteyê gerîlaya YJA-Starî Melsa Dêrik a ke warê Cîloyê Biçûkî yê Zapî de şehîd bîya.

Gerîka Melsa 28ê gulana 2021î de Cîloyê Biçûkî de Ronahî Xelîl û Zagros Avaşînî reyde tewra çalakîyêka xurt bîya. Melsa roja çalakîye birîndar bîye û 3 rojan ra dima şehîd bîye. Melsa wexto ke birîndare bîye rojnuşteyê xo de wina qala rojan ê xoverdayoxan kerda:

''Pê agêrayîşê koyî boyêke ameye verê mi. Wexto ke ez vejîyaya nê girî ser mi fam kerd ke zaf bêrîya koyî kerda. Her bêrîkerdiş kelecanî pîlêr keno. Kelecanê na serre zî koyanê Zapî de cîya bi. Ma pêro zanayêne ke emser serranê bînan ra cîya bi. No kelecan 23ê nîsane de zêdîya. Dişmenî hêzê xo warê Zendûra yê Metîna û warê Mamreşoyî yê Avaşînî de ca kerdî û agajîya operasyonê îşxalî pare kerde. Xoverdayîşî dest pêkerd. Gerîlayan bi xurtî xo ver da.

Ez zî nê waranê xoverdayîşî de bîya. Zap de, Cîloyê Biçûkî de. Mengêke ra zêdêr o Cîloyê Biçûkî de rayberîya fermandar Bawer Deyndar û Ronahî Xelîlî de xoverdayîşêko destanwarî yeno kerdene. Warê Ertûşî de ke ma tira vanê warê Tîpê Tyî vanê ke rayberîya embazanê Delale Dilxweş û Vîyane Botan de derbe ameye dayene dişmenî ro.

Ma nika sey komêka gerîlayan tunelanê şerî de vera bi hezaran leşkeranê tirkan xo ver danê. Dişmenî heta nika bi hezaran reyî xîret kerd ke debikewê tunelan la ser nêkewt. Coka artêşa tirke dest eşt şerê bêexlaqî.

Nika ê xîret kenê ke pê bombayanê gazî û gazanê kîmyewîyan îradeyê ma bişiknê. Ma dişmenê xo hol şinasnenê la dişmenî hema gerîlayî hol nêşinasnayî. Ma teqîbkerdoxê bi hezaran şehîdan ê. Gerîlayî wayîrê tradîsyonêkê xoverdayîşî yê, wayîrê exlaqê nê şerî yê.

Gerîlayî pêro wazenê şorê serê dişmenî, çalakîye bikerê. Her kes bi israrî fermandaranê xo ra ney wazenê. La leşkerê tirkî semedê remayîşî gêrenê fermandaranê xo. Ma semedê pere şer nêkenê, ma fedayî yê, ma xo semedê serkewtişê nê xoverdayîşî feda kerd.

Coka moralê ma tim berz o. Rixmê pêro şert û mercan zî ma her roje derbe danê dişmenî ro. No înan tersneno. Ma ne pê çekanê taybetan ne pê teknîkî ne zî pê gazanê kîmyewîyan şer kenê. Ma pê îradeyê Apogîrî şer kenê. Ez zanena û ez do hertim vaja ke no şer şerê serkewtişî yo. Serkewtiş ê şar û gerîlayan o...''