Kampa Multecîyan a Şehîd Rûstem Cûdîyî (Mexmûr) hêrişanê DAÎŞî yê 2014î ra nata binê tehdîtê Tirkîya, PDK û DAÎŞî de ya. Dewleta tirke kanûna 2017î ra nata bi desan reyî hêrişê kampe kerd. PDK zî 2 serrî yo şarê Mexmûrî ser o ambargo ano ca.

Ferzkerdişê qoricîtîye û vêşnayîşê dewan ra dima 1994 de mexmûrijî neçare mendî ke Vakurê Kurdîstanî ra koçê Başûrê Kurdîstanî bikerê. La Başûr de zî tedaya PDKyî ra înan 7 reyî kampe vurnaye. Mexmûrijî serra 1995î de zî Gelîya Qiyametî û kampanê Etrûşî de qirkerdiş û tedayanê PDKyî reyde têrî mendî.

Kampanê Etrûşî û Gelîya Qiyametî de xeylêk kesî hetê PDKyî ra dîyayî guleyan ver û ameyî qetilkerdene. Hetê bînî ra ambargoyê Neteweyan ê Yewbîyayeyan (NY) û PDKyî ra tay domanî vêşanîye ra merdî, tewr tay 15 hezar heywanî telef bîyî yan zî dest nîya înan ser. 27 serran de 63 mexmûrijî pê destê PDKyî ameyî qetilkerdene. Kampa Mexmûrî ser o ambargoyê PDK û Tirkîya dewam keno.

Mexmûrijan derheqê qirkerdişê Etrûşî yê 13ê êlula 1995î û serebûtanê kampanê Gelîya Qiyametî û Etrûşî ser o ANFyî rê qisey kerd.

Endamê Dîwanê Meclîsê Şarî yê Mexmûrî Hazim Karî vist vîrî ke mexmûrijî verî kampanê Biharê û Şeranişî yê Heftanînî de ca bîyî la dormeyê nê kampan zî hetê dewleta tirke ra ameyî bombardumankerdene.

Karî vat: ''Hêrişan ra dima ma derbazê kampa Bêsivê bîyî la uca de zî ma maruzê hêrişan medî. Grevê vêşanîye yê 29 rojan ra dima NY ma sey multecî qebul kerd la hêrişê dewleta tirke nêvindertî.  Ma şîyî Gelîya Qiyametî. O çax zî hêrişanê PDKyî dest pêkerd. PDK û Tirkîya pê operasyonê bi nameyê 'Çelîkî' hêrişê kampa ma kerd. Înan vatêne 'Şima hetkarîya PDKyî kenê.' ''

Sadik Guyî verî şehîda hêrişê Etrûşî Jîyane (Zeynepe Erdem) yad kerde û vat: ''Wexto ke ma koçê Başûrî kerd tay kesî Kampa Bêsivê de tay kesî zî kampa Gelîya Qiyametî de mendêne. PDKyî nêwaştêne ma pîya bibê. Nêzdîyê serneweyê 1995î de înan qismêkê şarî Etrûş de ca kerd. O çax heywanê ma estbîy. Ma sînorê Tirkîya ra zaf dûrî bîyî. La narey ma maruzê tedaya PDKyî mendî. PDKyî dormeyê kampanê Etrûş û Gelîya Qiyametî de girewtbi û kampî kontrol kerdêne. Verî înan Levent Ziravîgî , Abdullaj û Yunus şehîd kerdî. PDKyî heywanê ma diznayêne, cinîyan rê heqaret kerdêne. Nobetdarê heywananê ma hetê PDKyî ra ameyî şehîdkerdene. Wextê Operasyonê Çelîkî de PDK û NYyî waşt şar derbazê Kampa Etrûşî bibo la şarî nêwaştêne Gelîya Qiyametî ra şoro. Ambargoyê înan wina dest pêkerd. Ma 3 mengî binê ambargoyê Gelîya Qiyametî de mendî.''

Hazim Karî wina dewam kerd: ''Ambargoyê 3 mengan de înan kerd ke pê vêşanîye ma terbîye bikerê la ma teslîm nêbîyî. Şarê Kampa Etrûşî şewan hetkarîya ma kerdêne, erzaq ardêne. PDK wexto ke pê naye hesîya dafike naye ro û çend merdimê ma kerdî şehîd. ê prosesî de tay domanî zî vêşanîye ra merdî. Kampa Etrûşî zî ambargo protesto kerd û erzaqê NYyî nêgirewt.''

Wexto ke şarê kampa Etrûşî ambargoyî ser o eşkerayîye dayêne PDKyî guleyî varnayî înan ser. Hêriş de gerîlaya ARGKyî Zeynepe Erdem (Jîyane) şehîd bîye, 13 kesî zî birîndar bîyî. 

Şahîdanê ê hêrişî ra Salih Guyîyî wina qala ci kerde: ''Ma ver bi noqtaya kontrolî ya PDKyî şîyêne. Embaze Zeynpe verê wendekaranê sinifa yewine de bîye. Wexto ke ma nêzdîyê rayîrî bîye înan  embaze Jîyane kerde hedef, dima zî gulayî varnayî şarî ser. PDKyî dormeyê kampa etrûşî de 27 qereqolî ronabî. Înan eşya, heywanê ma talan kerdî. O çax tay şîwanî hetê PDKyî ra ameyî kiştene.''

Hazim Karî pare kerd ke dima ke kampê Etrûşî û Gelîya Qîyametî bîyî yew înan sîstemê xo hîna bihêz ronayî, no zî nêşi weşê dewleta tirke. Karî vat: ''Ma komîteyêke awan kerde, perwerde dewam kerd, hêzê xopawitişî awan kerdî. o çax medyaya tirkîya pê manşetan vatêne 'Komareya Etrûşî' bi nê hawayî PDKyî ma ser o teda zêdînaye.''

Serra 1996î de mexmûrijî narey derbazê kampa Nînova bîyî.

Karî ê rojan ser o vat: ''Înan ma rê vatêne 'şima ya kampe kenê vila yan zî ma şima teslîmê Tirkîya kenê.' Coka ma şîyî Kampa Nînova. Tay kesî zî şîyî kampanê Girê Gewrê û Hasenekê yê PDKyî. PDKyî Nînova da zî hêrişê ma kerd, tay kesî şehîd kerdî. Heta înan sereyê tay merdiman birnayî.''

Salih Guyîyî bale ante ser ke hêrişê PDKyî yê vera Mexmûrî zêdîyayî û vat: ''Tirkîya 3 serrî yo kampe dana bombayan ver, PDK di serrî yo vera kampe ambargo ana ca. PDK nêverdeno şar şoro Hewlêr. Hînî PDKyî ambargo zêdîna, ê hê rayîrê Kerkûkî zî qefilnenê. Ma do teslîm nêbê, cuya xo bipawê. Wa rayaumûmîya kurdan wayîra xoverdayîşê ma bibê. NY zî eke vera nê hêrişan tewir megêro hesab bido tarîxî.''

Tewr peynî Hazim Karî vat: ''26-27 serrî yo ma vera hêrişan senî xo ver da û îradeyê xo mojna ewro zî ma heman îradeyî mojnenê. Ma do rûmet, sîstem û cuya xo bipawê. Wayîrê têgêrayîşê azadîye vejîyê. Çunke ma wayîrê nê têkoşînî yê û pê ci bawer kenê.''