Iraq û Başûrê Kurdîstanî de semedê weçînayîşê 329 endamanê Meclîsê Temsîlkaran ê Iraqî 10ê teşrîna verêne de weçînayîş esto. Tevgera Azadî derheqê tewirê înan ê weçînayîşî de Silêmanî de eşkerayîyêke daye. Hemserekê Tevgera Azadî û endamê ci zî eşkerayîye de amade bîyî.

Hemserekê Tevgera Azadî Mihemed Ebdullahî venga pêro hemwelatîyanê Iraqî da ke raya xo bidê.

Hemsereke Tara Hisên zî da zanayene ke înan semedê heqanê cinîyan, waranê cuye, heqanê merdiman bernameyê hîrayî amade kerdî û 3 namzetê înan ê cinîyî estê. Tara Hisên vat: ''Cinîyî wayîrê ê îradeyî yê ke eşkenê ma temsîl bikerê. Ma venga pêro welatperweran danê ke wa bêrê raye bidê.''

Tevgera Azadî eşkera kerd ke ê do weçînayîşê parlamentoyî yê Iraqî de paştî bidê 4 namzetanê xoseran. Qiseykerdişan ra dima 4 namzetanê xoseran xo da şinasnayene.

Nê 4 namzetî nê kes ê:

Mihemed Hesen, Eyaletê Raperînî, herêma weçînayîşî ya 4., namzeto xoser ê bi numreya 29

Şirîne Ebdullah, Eyaletê Kerkûkî, herêma weçînayîşî ya 1., namzeta xosere ya bi numreya 33

Ronake Mecîde, Eyaletê Silêmanî, herêma weçînayîşî ya 2., namzeta xosere  ya bi numreya 29

Yusra Recep, Eyaletê Silêmanî, herêma weçînayîşî ya 5., namzeta xosere  ya bi numreya 23