Hemşaredara Tûşba Ayşe Mînaza ke roja îneyî Wan de ameye destbendkerdene û îfadeyê xo ra dima ameye veradayene, qiseykerdişê xo yê meclîsî de ke vatbi 'Salîh Efendî' no vatişê ci sey suca ame mojnayene.

Ayşe Mînaz û Yilmaz Berkî weçînayîşanê herêmîyan de Tûşba de HDPyî ra bîyî namzet û ser kewtî. La bi îdîaya ke Yilmaz Berkî bi qerarnameyê hukmê qanûnan wezîfe ra amebi dûrvistene Salîh Akmanê AKPyî sey şaredar Tûşba rê ame tayînkerdene.

Hemşaredara Tûşba ya HDPyî Ayşe Mînaz kombîyayîşê destpêkî yê meclîsê şaredarîye de wina vatbi: "Wexto ke Salîh Xoce mamostayê ma bi vatêne qelem û keda embazanê xo mediznê. La sîstem de bi dizêko pîl. Gelo şima kamyew dînî ra yî? Gelo şima eşkenê bi sereberzî bivejîyê verê şarî? No kursî yo ke şima serê ci de ronişenê ê mi û Yilmaz Berkîyî yo. Ez hurmetê nê meclîsî kena la hurmetê şima nêkena. Ma şima rê qet nêvajê şaredar. Ez do ci rê vaja 'Salîh Efendî'. Ti hetê YSKyî ra ameyî weçînayene."

Nê qiseykerdişî ra 10 mengî derbaz bîyî la polîsan qiseykerdiş xo vîrî ra nêkerd. Serê sibayê îneyî eşy keyeyê Mînaze ser. Berê keyeyî şikitî. Mînaze ra persa ke ''To çira bi nê hawayî qisey kerd? To fermanê Salîh Akmanî qij vînena?''

Hemşaredara Tûşba Ayşe Mînaz babete ser o zanayîşî dayî û ard ziwan ke Asayîş de vera aye şîdeto psîlojîk kerd. Mînaze vat: ''Bi taybetî derheqê qiseykerdişê min ê meclîsî de persî persayî. Mi rê persa vat 'To çira Salîh Akman wina qij vînena?' Înan vatêne qey mi bi fermanê kesêkî wina vat. Armnancê înan mi krîmînalîzekerdiş bi. Ma do meydanan de têkoşînê xo dewam bikerê.''