Payîzê 1991î de mi Îstanbul de Zeynepe Erdem (Jîyane) şinasnaye. Dima ke ma zîndanî ra vejîyayî pa Yasîn (Dogan Kiliçkaya) semedê şîyayîşê koyan gêrayêne rayîrî. Dima ke ez musaya 'warzeya' Yasînî yanî Jîyane Îstanbul de karê ERNKyî kena ma waşt ke aye bivînê û rayîrêk peyda bikerê.

Yasîn û Jîyane Sêwas/Kangalî ra bîyî. Yasînî Jîyane rê vatêne 'warze.' Eşkera yo ke babîyê Jîyane pîrêkê elewîyan bi. Jîyane hem xemgîn hem gonîgermin bîye. Samîmîyetê ci cade dîyayêne. Pêvînayîşê verênî de aye vat wextê nêzdîyî de xebere bida ma. Dima ma qezaya Avcilarî ya Îstanbulî de pêvînayîşê bînî de a nêzdî ra şinasnaye.

A wextêkê kilmî verî Beka ra warê Rayberîye ra amebî. Aye derheqê têkoşînî de bineyk qisey kerd. Avcilar de ma rojêke mende, roja bîne pê otobuse şîyî Cizîre. Hewteyêkî ra dima zî ma resayî Heftanîn. Peynîya menga teşrîna verêne de ma resabîy warê Rayberîye.

Reya diyîne adara 1992î de mi a warê Rayberîye de dîye. Aye waştbi tewra gerîlayan biba. 'Dewreyê Rayraşîyayîşê Îqtîdarî' yê Akademîya Mahsum Korkmazî de bîye. Wextêkê kilmî ra dima Dayîke Hatîce ameye warê Rayberîye. Wezîfe dîya Jîyane ke Dayîke Hatîce reyde eleqedar biba.

Dima ke ez û Yasîn ma şîyî Heftanînî Jîyane sey Îdarekarêka Akademî Beka de mende. Vilabîyayîşê Akademî ra dima a zî ameye Heftanîn û uca ra zî şîye Cûdî, Besta û Botan. Mi 1994 de a Besta de dîye. O çax aye karê çapemenîye kerdêne. Daktîloyê ci tim paştîya ci de bi, kalaşnîkofê ci milê ci de bi.

Mi tewr peyên Kongreya 5. ya Heftanînî de Jîyane dîye. Yasîn, Jîyane û ez ma reya peyêne roniştî. Yasînî kongre de qisey kerdbi: ''Hînî bi rastî zî ez tewra PKKyî bena.'' Jîyane semedê nasnameyê xo fotografê xo girewtbi û sicîlê xo amade kerdbi. Mi nasnameyê xo yê ARGKyî destê înan ra girewt. Kongre ra dima rayêke mi xebera şehadetê înan girewte. Yasîn Garzan de wezîfe kerdêne. O 12ê hezîrana 1996î de şehîd bi.

Mi 1994 de birayê Jîyane Pîr Kemal şinasna ke karê DHPyî kerdêne. Ey zî sey waya xo xo dabi karanê şorişî. Adara 2015î de mi reya verên o dî. Hamnanê 1996î de o tay embazanê xo reyde derbazê Dêrsimî bi. Yasînî ra dima mi eşnawit ke Pîr Kemal Garzan de şehîd bîyo.

Jîyane (Zeynepe Erdem) Anqara de sey tirkêkî pîl bibi. Pê rayîrê PKKyî aye kurdayetîya xo şinasnaye. Aye rayberîya mexmurijan kerdêne. Na rayberîye de Etrûş de 12ê êlula 1995î de hetê PDKyî ra ameye şehîdkerdene. PDK hema zî domananê çêran ê şarê kurdî qetil keno, Jîyane zî hema zî rayberîya têkoşînê vera îxanetî kena.