Şubeyê Amedî yê Komeleya Heqanê Merdiman (ÎHD) muracatanê tepişteyan û keyeyan ser o Zîndananê Hûmara 1 û 2 yê Xarpêtî û Zindanê Cinîyan ê Xarpêtî de 17ê çeleyî de cigêrayîş kerd û raporêk amade kerd. Rapor bînaya komele de bi kombîyayîşêkê çapemenîye ame eşkerakerdene. Serekê ÎHDyî yê Amedî Abdullah Zeytunî ard ziwan ke Zîndananê Xarpêtî de 3 serran ra nata bi hawayêkê nîzamî heqê tepişteyan yenê binpaykerdene.

Endama Heyetê Îdareyî ya ÎHDyî ya Amedî avûkate Gurbete Yavuz bale ante mektubanê tepişteyan ser û nê zanayîşî dayî: "Waştişê weşkerdişî bêcewab yeno verdene, weşkerdişê bi kelemçeyan yeno kerdene. Tim înan rê cigêrayîş yeno kerdene û nê cigêrayîşan de cezayê keyfî yenê dayene, dest nayîye eşyayê înan ser o, seba aktîvîteyanê sporî, hunerî û kulturî destûr nêno dayene. Kovar û rojnameyî nênê dayene. Heqê xoşebere û verarî yê pêvînayîşan yenê binpaykerdene. Kantînan de vaya eşyayan zêde ya û tepişteyî hucreyê yew kesî de yenê vindertene."

Rapor de vatişê tepişteyan ameyî vîrvistene û ame îfadekerdene ke zîndanan de rîskê cuye esto.