Xebata Yewîya Kurdîstanî zî derheqê erdlerzî de eşkerayîyêka nuştekîye daye û vengdayîşê paştdayîşê mexduran kerd.

Eşkerayîya bi sernameyê ''Ma venga şarê xo danê ke paştî bido mexduranê erdlerzî!'' wina ya:

''Astengî dewam bikerê zî ma şarê xo ra wazenê ke wa paştî bido mexduranê erdlerzî. Walîtîya Xarpêtî hetkarîya Şaredarîya Erxenî yê 2 kamyonan açarnaye ke skandalêko pîl o. Bi nê hawayî wazenê ke kurdî hetkarîya yewbînan nêkerê.

Her çiqas verê cû ame eşkerakerdene ke Xarpêt de do erdlerz bêro meydan tebdîrî nêameyî girewtene. Erdlerz serebûtêkê xozayî yo û la eke vera erdlerzî tebdîrî nêrê girewtene na peygoşî ya. 

Seke yeno zanayene ma serê xeta fayanê erdlerzî de ciwîyenê. Coka ganî şar bêro perwerdekerdene ke ver û dimayê erdlerzî çi bêro kerdene. Çunke wezîfeyê dewlete têna arêdayîşê bacan û cezakerdişê şarî nîyo."