Komîteya Merkezî ya PKKyî eşkerayîyêka nuştekîye weşanaye û mesajê girdkerdişê têkoşînî û serkewtişî dayî.

Eşkerayîya PKKyî wina ya:

''Ma serrgêra 21. ya komploya mîyanneteweyî ya 15ê sibate de yê ke seba kurdan roja 'qirkerdişî' ya. No komplo yo ke 21 serrî verê cû ame kerdene seba temamkerdişê qirkerdişê kurdan bi. Têgêrayîşê Azadîye yê Kurdîstanî vera nê komloyî û tecrîdî bi hawayêkê topyekûnî şerê azadîye keno. Ma waştiş û qerardarîya xo reyna nîşan kenê ke ma do têkoşînê merdimîye yê fîrazî serra vîst û diyîne de zî xeta serkewtişî ser o bikerê. 

Nê esasî ser o reya verêne ma viraştoxê nê xoverdayîşî yê azadîye Rayber Apo rê selam kenê. Ma şehîdanê xo yê ke wayîrê Rayber Apoyî vejîyayî bi mînet û rêzdarî yad kenê.  Ma serrgêra 14. ya şehadetê endama Komîteya Newera Awankerdişê PKKyî embaze Vîyane Soran de yê ke şewa 1-2ê sibata 2006î de xo kerd gogêkê adirinî û seba wedaritişê rijnayîşê sîstemê tecrîdê Îmraliyî veng da.  Nê esasî ser o ma şehadetê embaze Vîyane Soran û şexsa aye de pêro şehîdanê têkoşînê azadîye bi rêz û mînet yad kenê. Embaze Vîyane bîye raybera cinî û ciwananê Başûrê Kurdîstanî û her tim xeta Rayber Apoyî ser o şîye. Ma soz danê ke ma do wayîrê armancê ci bivejîyê. 

Seke yeno zanayene bi komployê mîyanneteweyî yo ke 9ê teşrîna verêna 1998î de dest pêkerd û 15ê sibata 1999î de bi tecrîdê vera Îmraliyî ame dewamkerdene, waştêne ke Rayberê Şarê Kurdî Abdullah Ocalanî îmha bikerê, Têgêrayîşê Azadîye yê Kurdîstan û PKK tasfîye bikerê û qirkerdişê kurdan temam bikerê û demokratîkbîyayîşê Rojhelatê Mîyanênî asteng bikerê.Hêzê komlogerî seba nê armancab 21 serr ê ke hêzê xo seferber kerdî hêrişê PKKyî û şarê kurdî kenê. Qirkerdişê kurdan, îşkenceyê bi Îmraliyî û sîstemê tecrîdî hema zî dewam kenê.

La xîretê înan pûç ê. Partîya ma 21 serran ra nata hêrişanê komplogeran zaf reyî şiknayî. Rayberîya partîya ma de  gerîlayanê ma, ciwananê ma, cinîyanê ma, şar û dostanê ma xeta fedayî ya Apoyî de xo ver da û komplo pûç kerd. Serra newîye ya têkoşînî de xoverdayîşê ma yê azadîye do tecrîd bişikno, faşîzmê AKP-MHPyî birijno û Kurdîstan azad bikero, Tirkîya û Rojhelatê Mîyanênî zî demokratîk bikero.

Mehkemeya Belçîka derheqê kurdan û PKKyî de birêka zaf girînge daye. Eşkera yo ke bira ke derheqê PKKyî de hetê Mehkemeya Berze ya Belçîka ra ameye tesdîqkerdene, bi esasî mehkumîyetê huqûqî yê komployanê 9ê teşrîna verêne û 15ê sibata 1999î ya. Bêguman na bire seba kurdan û merdimîye asta tarîxîye de girîng a.Sîstemê Îmraliyî hînî seba her kesî bi tecrîd û îşkence. Coka kesêk nêwazeno bi nê sîstemî biciwîyo. Naye ra serra 22. ya vera tecrîd û komplo do bi rayîr û metodanê zengînan û bi têkoşînêkê hîra derbaz biba, îşkenceyê Îmraliyî û sîstemê tecrîdî teqez do parçe bikera û do ser bikewa.

Nê esasî ser o sere de kadroyanê ma yê partîye, ma venga hêzanê xo yê gerîlayan, şarê xo yê welatperwerî û dostanê xo danê ke vera komloyî hişmendîya têkoşînî hîna xurtêr bikerê, îradeyê ma yê seba çinkerdişê tecrîd û komployî bi hêz bikerê, menga sibate de vera komplo û tecrîdî têkoşînê bi şew û roje her ca de berz bikerê û serra 22. bikerê serra serkewtişî."