Emîne Şenyaşara ke laj û mêrdeyê ci hetê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde  200 rojî yo verê Edlîyeya Riha de Nobeta Edaletî kena. Roja 200. de 200 avûkatî do tewrê nobete bibê û eşkerayîye bidê. Coka warê edaletî yê Keyeyê Şenyaşarî de pankartê bi dîmenanê wextê hêrişî û nobete ameyî cakerdene.

Polîs warî rê mudaxele kerd û bi îdîaya ke 'merdimî yenê tehrîkkerdene' dest na pankartan ser. Na hele mabênê Emîne Şenyaşar û polîsan de nîqaş qewimîya. Dayîke Emîne vat 'Edaletê dewlete çin o.'' Polîsan pê vateyê 'DEwlete tîya de ya' kerd ke aye provoke bikerê.

Mabênê polîsan û avûkatan de zî nîqaş qewimîya. Polîsan pankart û fotografê ke dest na ser berdî edlîye.

Polîsan xîret kerd ke telefon û makîneya muxabîrê MA Emrullah Acarî bigêrê la mudaxeleyê avûkatan ra dima ekîpmanê Acarî reyna dîya ey.