Şervananê YBŞ û YJŞyî  û Asayîşê Êzidxanî bi wesîleya serrgêra Fermanê 3ê Tebaxe merasîmo leşkerî organîze kerd.

Merasîm de şehîdê Fermanê 74î û Têkoşînê Azadîye yê Kurdîstanî ameyî yadkerdene û ame vengdayene ke wa şarê kurdî û êzidîyan têkoşînê xo xurtêr bikerê.

Axîne Întîkama ke merasîm de bi nameyê YJŞ û YBŞyî qisey kerd verî şehîdê fermanî yad kerdî û  nê vatî: ''Ma nêeşkenê vajê ke ferman qedîya û ma hinî azad ciwîyenê. Bitaybetî nê des serran de ma sey hêzanê YBŞ û YJŞyî serkêşîya Şehîd Saîdî de têkoşînê şorişî yo ke rayra benê Şehîd Dijwan, Zerdeşt, Pîr Çeko û bi desan embazanê ma yê bînan ci rê rayberîye kerd. înan serkêşîya Êzidxanî kerd û semedê pawitişê kulturê Êzixanî ganê xo feda kerd. Nê rayraşîyayîşê des serran de ma vera xeylêk hêrişan û komployanê leyminan xover da û ma do vera hêrişanê serê komelê xo tim têkoşîn bikerê.''

Axîne Întîkam bale ante hêrişanê dewleta tirke ser û wina dewam kerd: ''Erdogan û DAÎŞî herême de hêrişê her kesî kenê. Xozaya Kurdîstanî talan kenê  û îşxal kenê. Dewleta tirke bi aktuelkerdişê DAÎŞî kena ke plananê xo bîyaro ca.Eynî wextî de dormeyê PDKyî de çeteyanê xo kom kena û bi înan hêrişê şarî kena. Ma nê plananê leyminan ê dewleta tirke zanê û qebul nêkenê. Ma têna êzidîyan nê hazirê ke heme şaranê Iraqî bipawê. Ma do vera dişmenê îşxalkerî yo ke wazeno heme kultur, dîn, bawerîyan çîn bikero, xover bidê.''

Axîne Întîkam nê vatî: ''Barzanîyan wextê fermanî de îxanetê komelê êzidîyan kerd. Ewro nê îxanetê xo girdêr kenê. Keyeyê Barzanî bi îxanetê xo yeno zanayene  û ewro pîya bi DAÎŞî têgêreno. Nê kenê ke kultur, bawerî û estbîyayîşê êzidîyan çîn bikerê. Ma serrgêra 10. de veng danê heme rayrapêroyîye ke wa vera nê plananê leyminan vejîyo. No plano ke ewro vera Başûrê Kurdîstanî yeno kerdene siba vera Îraqî bêro kerdene.  

Ma sey hêzanê YBŞ û YJŞyî semedê pawitişê Şingalê Xoserî û Êzidxanê bimbarekî û pawitişê destkewteyanê xo her vinceyê na herre de gonî rişnaye. Ma do destûrê fermananê neweyan medê. Ma veng danê ke wa pêro şarê ma agêro Şingalî û herra xo ya bimbareke bipawo. Ma reyna şehîdanê xo bi hurmetî yad kenê û soz danê ke ma do na herra bimbareke bipawê.''