Berpirsîyarê Çapemenîye yê QSDyî Ferhad Şamîyî derheqê hêrişanê dewleta tirke yê vera Rojawan û Sûrîye û planê îşxalî yê dewleta tirke de ANFyî rê qisey kerd.

Şamîyî vist vîrî ke dewleta tirke wextê peyênî de hêrişê vera Eyn Îsa, Til Temir, Zirgan, Minbic,  Şêrawa û Şera yê Efrînî zêdînayî. Şamîyî bale ante ser ke şerê Rûsya-Ukrayna firsend da Tirkîya ke hêrişanê neweyan bikera. 

Şamîyî vat: ''Erdogan û Serekê Fermandarîya artêşa tirke xo rê bi zelalî vanê ke ê do hêrişan bizêdînê. Bi top û tankan derbazê Sûrîye benê û kenê ke xeta Îdlîbî sey herêmêka tamponî bidê qebulkerdene. Na herêma tamponî zereyê xo de Heleb, Bab, Mare, Ezaz, Til Koçer, Dêrik û Şingal zî muhtewa kena. Yanî planê îşxalî yo. Erdogan vano ê mîlyonêkî sûrîyeyîjan bişawê. No zî parçeyêkê xeyalê îşxalê Sûrîye yo. Nika Sûrîye hetê artêş, sîyasî û ekonomîkî ra qels a. Eşkera yo dewleta tirke wazena ney ra fayde bikera. Tay hêzê Sûrîye zî seba artêşa tirke xebitîyenê.

Dewleta tirke wazena nê bi mîlyonêk merdiman erdê cîyayî de ca bikera û bi nê hawayî îşxalê xo mende bikera, demografî bivurna, şarê esasî erdê ci ra veja û nê merdiman ra artêşêka alternatîfe biaferna. No çi do bibo belaya sereyê pêro Sûrîye û tehlukeyêkê pîlî do virazo. Çinkerdişê nê projeyî têna wezîfeyê QSDyî nîyo wezîfeyê pêro şaranê herême yo. Ganî pêro şarê Sûrîye û Rojawanî vera îşxalî wurzê we. QSDyî verî verê nê planê îşxalî girewtbi. Eke QSDyî ra nêbîyayêne Erdoganî Camîyê Emewî de nimaj kerdêne. Erdogan têna dişmenê QSDyî nê dişmenê pêro kurdan û Kurdîstanî yo.

Ma heta nika xo ver da û ma do naye ra pey zî xo ver bidê. Gamanê ma yê sîyasî û dîplomatîkan reyde gamê ma yê leşkerî zî est ê. Ma bi ruhê neteweyî û zerrî ra vera îşxalkeran şer kenê û ma hêzanê sey ma reyde do îtîfaq bikerê. Ma do erdê xo ra îşxalkeran vejê.''