Înîsîyatîfê Mayanê Haştîye yê Îstanbulî Tunelê Taksîmî de waşt ke rayraşîyayîşê haştîye bikerê la polîsan destûr nêda. Wekîla DEM Partî Çîçeke Otlu û Hemsereka DEM Partî ya Îstanbulî Arîfe Çinar zî paştî daye çalakîye. 

Girseyî astengîya polîsan bi slogan, tîlîlî û çalakîya roniştişî protesto kerdî. Polîsan merşê Hernê Pêşî yê mayan bahane kerd.

Mayan rixmê astengîyan zî eşkerayîya xo daye û sere de mayanê leşkeran venga pêro mayan da: ‘’Ma dest bidê destî. Wa hinî mayî mebermê.’’

Mayan bale ante vengdayîşê Rayber Apoyî ser û vat ke ê paştî danê nê vengdayîşî.

Mayan îfade kerd ke ganî partîyê sîyasîyî seba haştîye erk û mesuldarîya xo bîyarê ca û vat: ‘’Wa tepişteyê sîyasî û nêweşî vera bidîyê. Wa ziwan bibo ziwanê haştîye.’’

Mayan peynî de venga rojnamegeran zî da û vat: ‘’Bêrê ma paştî bidê haştîye. Ma destê înanê ke seba haştîye destê xo derg kerdo, bihêz bikerê.’’