AKPyî serra 2025î sey ‘Serra Keyeyî’ îlan kerde û naye reyde xeylê polîtîkayê dişmenê cinîyan vistî dewre. Platformê ‘Cinîyî pîya bihêzêr ê’ (KGB) ra Roza Kahya derheqê babete de ajansê ma rê qisey kerd.

Roza bale ante ser ke Paketa Hukmî ya 10ine de seke cezayê sûcê şîdetî zêdîyayê la camêrdî mehkemeyan de ‘halê holî’ ra kêmkerdişê ceza sey xelate gênê.Roza vat: ‘’Goreyê paketa newîye ma hinî protestoyanê vera şîdetê camêrdan ra eşkenê bitepişîyê heta bi terorîzmî bêrê sûcdarkerdene. La camêrdî qetilkerdişê cinîyan ra ancax 2-3 mengan tepişîyenê, dima halê golî ra vera dîyenê.’’

Roza da zanayene ke îqtîdarê AKPyî destpêkî ra nata vera cinîyan polîtîkayanê dişmenîye ano ca û vat: ‘’AKPyî hêverî kurtaj qedexe kerd. Netîceya têkoşînê cinîyan de îqtîdar neçare mend ke apey game bierzo. Nika bi polîtîkayan kurtaj bi hawayêkê fîlî qedexe nîyo la yeno astengkerdene. Ancî îqtîdarê AKPyî tim cinîyan rê zewaj û tûrardiş ferz kerdî.

Peymana Îstanbulî, heqê nafaqa, madeya qanûnê 6284î pêro wextê AKPyî de wedarîyayî. Hetê bînî ra nê polîtîkayê Serra Keyeyî seke ‘teşwîqkerdişê tûtardiş û zewajî’ asenê. La îqtîdar binê nameyê ‘hetkarîya ekonomîke’ de şar keno binê deynan.

Îqtîdar bi qiseyê ‘Serra Keyeyî’ zî têgêrayîşanê cinîyan û femînîstan keno hedef. Îqtîdar zaneno ke nê têgêrayîşî bihêzêr bîyê coka bi nê polîtîkayan têkoşînê ma keno hedef. La îqtîdar se bikero zî ma do vera cînayetan, şîdet û îstîsmarê cinîyan têkoşînê xo rê dewam bikerê.’’