2016 de şerwananê QSD, YPG û YPJyî Şehba azad kerdbî. La dima ke dewleta tirke Efrîn îşxal kerd sînorê Şehba vurîyayî. Sînorê vakurê Şehba de dewleta tirke û cergê ci, başûr, rojhelat û rojawanê Şehba de zî serdestîya rejîmê Şamî est a. Coka Şehba binê ablûqaya înan de ya. Têna rayîrêk (rayîrê dewa Ehdasî) şino Şehba, o zî destê Tugayê 4. de yo.

Seba ke Tugayo 4. bazirganîya nê rayîrî ra bazanê berzan gêno Şehba de sere de sotemenî berhemê werdî zaf vay ê. Sûka Reşe ya Şehba de lîtreyê gazî tewr tay 4300 lîraya Sûrîye, tup zî 90.000 lîraya Sûrîye ya. Şehba de 100 hezar  ra zêdêr koçberî zî est ê ke nê kampanê Şehba, Efrîn, Veger, Serdem û Berxwedanî de ciwîyenê.

Reyna Şehba de zîret û warê weşîye zî binê tesîranê nê vayîyan de yê.

Ma binê ambargoyê rejîmî de yê

Hemserekê Meclîsê Herêma Efrînî Zelox Bekîrî derheqê babete de ANFyî rê qisey kerd.

Bekîrî da zanayene ke Şehba çar serrî yo binê ablûqa de ya û vat: ''Serê ma de ambargoyê giranî yê rejîmê Şamî est o. Ma têna eşkenê rayîrêkî ra nê ambargo û ablûqa bişiknê, o zî destê Tugayê 4. de yo. Nê hêzî ge ge rayîrî qefilnenê û bacêkê zaf berzî wazenê. Rejîmê Şamî hemkarîya cerganê dewleta tirke keno. Rejîmê Şamî wazeno Îdareyê Xoserî çimê şarî de qij bikero.

Ma amade yê ke vera pêro zehmetîyan zî bi her hawayî têkoşîn bikerê. Ma do qetî verê rejîmê Şamî û dewleta tirke sereyê xo mearê war. Ma neçarîye ra Efrînî ra vejîyayî û ma seba agêrayîşê Efrînî sond wend ke têkoşîn bikerê. Efrîn, Şehba, Şêxmeqsûd û Eşrefîyê heta peynî têkoşîn bikerê.''

Rengîne Mihemeda ke Efrînî ra koçê Şehba kerdo vat: ''Nê ambargo û ablûqayî qetî ma qels mekerê. Ma do mîyanê pêro şertan de zî têkoşîn bikerê.''